Nandurbar Accident: नंदुरबार जिल्ह्यातील नवापूर तालुक्यात असलेल्या राष्ट्रीय महामार्ग क्रमांक 53 वरील कोंडाईबारी घाटात गुरुवारी भीषण अपघाताची घटना घडली. भरधाव वेगाने जाणारा ट्रक अचानक 35 फूट खोल दरीत कोसळल्याने परिसरात एकच खळबळ उडाली. सुदैवाने या भीषण अपघातात कोणतीही जीवितहानी झाली नाही. ट्रक चालकाला किरकोळ दुखापत झाली असून त्याच्यावर उपचार सुरू आहेत.

प्राथमिक माहितीनुसार, ट्रक घाटातील उतारावरून जात असताना त्याचे ब्रेक अचानक निकामी झाले. त्यामुळे चालकाचे वाहनावरील नियंत्रण सुटले. त्याचवेळी समोरून गुजरात राज्य परिवहन महामंडळाची बस येत होती. संभाव्य मोठी दुर्घटना टाळण्यासाठी चालकाने प्रसंगावधान राखत बसला वाचवण्याचा प्रयत्न केला. मात्र, नियंत्रण सुटल्याने ट्रक थेट रस्त्यालगतच्या सुमारे 35 फूट खोल दरीत कोसळला.

या अपघातात चालक लोकेशभाई (रा. अजमेर) यांना किरकोळ दुखापत झाली. स्थानिक नागरिक आणि महामार्ग पोलिसांनी तातडीने घटनास्थळी धाव घेत बचावकार्य सुरू केले. चालकाला सुरक्षितपणे बाहेर काढून तात्काळ विसरवाडी ग्रामीण रुग्णालयात दाखल करण्यात आले. सध्या त्याची प्रकृती स्थिर आहे.

अपघातानंतर काही काळ महामार्गावरील वाहतुकीवर परिणाम झाला होता. मात्र, महामार्ग पोलिसांनी घटनास्थळी तत्काळ पोहोचून वाहतूक सुरळीत करण्यासाठी आवश्यक उपाययोजना केल्या. क्रेनच्या सहाय्याने अपघातग्रस्त ट्रक हटविण्याचे काम हाती घेण्यात आले. त्यामुळे काही वेळातच घाटातील वाहतूक पूर्ववत करण्यात आली.