संजय सूर्यवंशी 

नांदेड : ग्रामसडक योजनेंतर्गत महिनाभरापूर्वी झालेल्या डांबरी रस्त्याचे काम निकृष्ट दर्जाचे झाल्याचे पाहण्यास मिळत आहे. चक्क हाताने डांबरीकरण केलेला हा रस्ता उखडून निघत असल्याने रस्त्याच्या कामाचा दर्जा उघड झाला आहे. अर्थात तरुणाने रस्त्याचे निकृष्ट झालेल्या कामाची पोलखोल केली असून नांदेड जिल्ह्यातील बोगस काम उजेडात आले आहे. 

नांदेड जिल्ह्याच्या नायगाव तालुक्यातील बेटकबिलोली येथील हा प्रकार आहे. तर बोगस डांबरीकरण रस्त्याचा व्हिडिओ सोशल मीडियावर प्रचंड व्हायरल होत आहे. नांदेड जिल्ह्यातील ग्रामीण भागात निर्माण होत असलेले डांबरीकरण रस्ते आता भ्रष्टाचाराचे कुरण बनत असल्याचा प्रकार समोर येत आहे. नांदेड जिल्ह्यात यापूर्वी देखील असाच प्रकार समोर आला होता. यानंतर पुन्हा एकदा बोगस रस्त्याचे काम समोर आले आहे. 

महिनाभरापूर्वीच झाला होता रस्ता 

दरम्यान नांदेडच्या नायगाव तालुक्यातील बेटकबिलोली त्या गावाला जाणाऱ्या डांबरी रस्त्याचे काम बोगस झाल्याचा प्रकार समोर आला आहे. एका महिन्यापूर्वीच केलेला डांबरीकरण रस्ता तरुणाने चक्क हाताने उकडून दाखवला आहे. त्यामुळे या कामाचा दर्जा उघड झाला आहे. मुख्यमंत्री ग्रामसडक योजनेअंतर्गत नायगाव ते बेटक बिलोली पर्यंत हा डांबरीकरण रस्ता तयार करण्यात आला. या डांबरीकरण रस्त्यासाठी ६ कोटी ६६ लक्ष निधी खर्च करण्यात आला. 

गुन्हा दाखल करण्याची तरुणाची मागणी 

नायगाव विधानसभा मतदारसंघाचे भाजपाचे आमदार राजेश पवार यांच्या मतदारसंघातील हा प्रकार आहे. डांबरीकरण केलेल्या रस्त्यावरील डांबर अगदी सहजपणे हाताने उखळून निघत आहे. यामुळे बोगस डांबरीकरण रस्त्याच्या कामाची चौकशी करून संबंधितांवर गुन्हे दाखल करण्याची मागणी या तरुणाने केली आहे.