संजय सूर्यवंशी

नांदेड : विद्यार्थ्यांना घेऊन जात असलेल्या ऑटो रिक्षाच्या समोर अचानक हरीण आले. या हरणाला वाचविण्याच्या प्रयत्नात ऑटो रिक्षाचा अपघात झाला. या अपघातात एका विद्यार्थ्यांचा जागीच मृत्यू झाला आहे. तर एकजण गंभीर जखमी असून इतर चार विध्यार्थी किरकोळ जखमी आहेत. 

नांदेडच्या (Nanded) उमरी तालुक्यातील हातनी फाटा येथे सदरचा अपघात घडला. उमरी तालुक्यातील हातनी या गावातील विद्यार्थी आहेत. गावापासून जवळ असलेल्या बळेगाव येथील शाळेत सर्व विद्यार्थी (Student) शिक्षणासाठी रोज ऑटो रिक्षाने जात असतात. आज देखील नेहमीप्रमाणे विद्यार्थी रिक्षाने जात असताना बळेगाव ते हातनी रस्त्यावर असलेल्या हातनी फाटा येथे अचानक ऑटोच्या समोर शेतातून वेगाने हरीण धावत आले. हे हरीण रिक्षाला धडकल्याने रिक्षाचा अपघात झाला.

ऑटो रिक्षा पलटी होऊन झालेल्या (Accident) अपघातात एक विद्यार्थी जागीच ठार झाला आहे. अन्य एक गंभीत जखमी झाला असून इतर चार विद्यार्थी किरकोळ जखमी झाले आहेत. रिक्षा पलटी झाल्याचे समजताच परिसरातील नागरिकांनी मदतीसाठी धाव घेतली. यानंतर सर्व जखमी विद्यार्थ्यांना उमरी आणि नांदेडच्या शासकीय रुग्णालयात उपचारासाठी दाखल करण्यात आले आहे.