नांदेड : व्यायाम करुन घरी आल्यानंतर बांधकाम व्यावसायिक तरुणाचा हृदयविकाराचा तीव्र झटका आला. यामध्ये त्यांचा मृत्यू झाल्याची हृदयद्रावक घटना समोर आली आहे. धक्कादायक बाब म्हणजे, अवघ्या दीड महिन्यावर त्यांचे लग्न होते. नांदेड शहरातील अयोध्यानगरीत ही मनाला चटका लावणारी घटना घडली आहे.

जिममध्ये व्यायाम करून घरी येताच एका बांधकाम व्यावसायिक तरूणाचा हृदयविकाराच्या धक्क्याने मृत्यू झाला. नांदेड शहरातील अयोध्यानगरीत ही दुर्दैवी घटना घडली आहे. शुभम ठाकूर (वय २९) असं मृत तरुणाचं नाव आहे. विशेष म्हणजे शुभम यांची आठ दिवसांपूर्वी सोयरीक जुळली झाली होती. तीन ऑगस्ट रोजी त्यांचा लग्न ठरलं होतं, मात्र नियतीनं घात केला. या घटनेनं कुटुंबियांवर दुःखाचा डोंगर कोसळला आहे.

शुभम ठाकूर हे अयोध्यानगरी येथील रहिवासी असून तो बांधकाम व्यवसायिक होता. सामाजिक कार्यात देखील ते अग्रेसर राहत होते. दरम्यान, रोजच्याप्रमाणे शुभम हे व्यायामासाठी जीमला गेले होते. जीम करून ते घरी परतले. घरी आल्याबरोबर ते पाणी प्यायले. तेवढ्यात त्यांना हृदयविकाराचा तीव्र झटका आला.

कुटुंबियांनी त्याला तात्काळ शहरातील खासगी रुग्णालयात दाखल केलं, मात्र डॉक्टरांनी त्यांचा मृत्यू झाल्याचं जाहीर केलं. विशेष म्हणजे शुभमचा नुकताच साखरपुडा झाला होता. तसेच येत्या तीन ऑगस्टला त्यांचा विवाह देखील निश्चित झाला होता. मात्र, अंगाला हळद लागण्यापूर्वीच शुभमसोबत नियतीने घात केला. या घटनेनं कुटुंबियांवर शोककळा पसरली आहे.