नांदेड - नांदेड शहरातील (Nanded) नमस्कार चौकात एक भीषण अपघात (Accident) झाला. भरधाव वेगाने जाणाऱ्या ट्रॅव्हल्स बसने (Travel Bus) दुचाकीला जोराची धडक दिली. या अपघातात पती-पत्नीचा जागीच मृत्यू झाला असून एकजण गंभीर जखमी झाला आहे. मंगळवारी २६ एप्रिल) रोजी ही घटना घडली आहे.

शिवानंद डांगे आणि इंदुबाई डागे असं मृत पती पत्नीचे नाव असून गोविंद मोरे असं गंभीर जखमी झालेल्या व्यक्तीचे नाव आहे. मिळालेल्या माहितीनुसार, डांगे पती पत्नी आणि गोविंद मोरे हे तिघेजण एकाच दुचाकीवर (Bike Accident) नांदेडहून मुदखेडच्या दिशेने जात होते. शहरातील नमस्कार चौकात आल्यानंतर भरधाव वेगाने येणाऱ्या ट्रॅव्हल्स बसने डांगे यांच्या दुचाकीला जोरदार धडक दिली.

अपघात इतका भयंकर होता की, ट्रॅव्हल्सने अक्षरश: दुचाकीला फरफटत नेले. यामध्ये डांगे पती-पत्नीचा जागीच मृत्यू झाला तर मोरे हा गंभीर जखमी झाला. दरम्यान, या अपघाताचा थरार सीसीटीव्ही कॅमेऱ्यात कैद झाला आहे. याप्रकरणी विमानतळ पोलिसांनी ट्रॅव्हल्स चालकाविरोधात गुन्हा दाखल केला असून पोलीस पुढील तपास करत आहे.

Edited By - Satish Daud