नालासोपारा : दुकानात चोरी होवू नये; याकरीता चोरांना पकडण्यासाठी एका महिलेने चक्क लोखंडी ग्रीलमध्‍ये विद्युत प्रवाह (Electric Shock) सोडला होता. परंतु, चोर तर नाही अडकला मात्र ग्रीलला लावलेल्या करंटमध्ये १८ वर्षीय मुलाचा मृत्यू (Death) झाल्‍याची घटना घडली आहे. (Maharashtra News)

नालासोपारा पुर्वेकडील मोरेगांव येथे राजाराम अपार्टमेंट शॉप नंबर ३ येथील राहणाऱ्या आरोपी मिरा संजय कांदु या महिलेचे दुकान आहे. रात्रीच्‍या वेळी दुकानात चोर शिरु नये; यासाठी महिलेने बाथरुममधील खिडकीच्या लोखंडी ग्रीलला चक्क इलेक्ट्रीक करंट लावून ठेवले होते. या खिडकीला हात लागल्याने राकेश नरेंद्र शिंदे (वय १८) या मुलाचा दुदैवी मृत्यू झाला आहे.

महिलेवर सदोष मनुष्‍यवधाचा गुन्‍हा

राकेशच्या मृत्यूस कारणीभूत असलेल्‍या मिरा कांदु या महिलेवर सदोष मनुष्यवधाचा गुन्हा दाखल तुळींज पोलिसांनी केला आहे. सध्या आरोपीला महिलेला नोटीस पाठवून तिला वसई न्यायालयात हजर करणार असल्याची माहिती तुळींज पोलीस ठाण्याचे वरिष्ठ पोलीस निरीक्षक शैलेंद्र नगरकर यांनी दिली आहे.