पराग ढोबळे 

नागपूर : राज्यात कोरोना व्हायरसने पुन्हा एकदा डोके वर काढले आहे. यात नागपूरमध्ये देखील कोरोनाचे रुग्ण आढळून आले असून यात दोन जणांचा मृत्यू झाला आहे. यामुळे आरोग्य यंत्रणेकडून उपाययोजना करण्यात येत असताना आता स्वाईन फ्लू आजाराने डोके वर काढले आहे. पावसाळ्याच्या तोंडावर रुग्ण आढळून आल्याने आरोग्य यंत्रणेचे टेन्शन वाढले आहे.

देशात कोरोनाची लागण झालेल्या रुग्णांची संख्या दिवसेंदिवस वाढत आहे. यात महाराष्ट्र कोरोना रुग्णांच्या संख्येत दोन नंबरवर आहे. यामुळे आरोग्य विभाग सतर्क झाला असून उपाययोजना म्हणून बेडची स्वतंत्र व्यवस्था करण्यात आली आहे. दरम्यान नागपूरमध्ये देखील मागील काही दिवसात कोरोनाचे रुग्ण आढळून आले असून कोरोनाने दोन जणांच्या मृत्यू झाल्यानंतर आता स्वाइन फ्ल्यूने तोंड वर काढायला सुरुवात झाली.

स्वाईन फ्लूने एकाचा मृत्यू 

सध्या विदर्भात मान्सून लांबला असून नागपुरात ऊन पावसाचा खेळ सुरू आहे. त्यामुळे हे वातावरण स्वाईन फ्लू आजारासाठी पोषक ठरत आहे. यातच नागपूर जिल्ह्यात स्वाईन फ्लूच्या एका रुग्णांचा मृत्यू झाल्याची माहिती पुढे येत आहे. नागपूर जिल्ह्यातील सावनेर येथे ६० वर्षीय व्यक्तीच्या प्रकृती बिघडली. त्यांच्यात स्वाईन फ्ल्यू सदस्य लक्षणे आढळून आल्यावर त्यांच्यावर उपचार करण्यात आला. मात्र मे महिन्याच्या शेवटी त्यांचा मृत्यू झाला.

आरोग्य विभागाच्या नोंदणीनुसार पूर्व विभागातील सहा जिल्ह्यांमध्ये १ जानेवारी ते ५ जून दरम्यान २७ स्वयंपलीचे रुग्ण मिळून आले. यापैकी सर्वाधिक १४ रुग्ण हे केवळ नागपूर शहरी भागात मिळून आले आहेत. तेच ग्रामीण भागात ६ रुग्णांची नोंद झाली. तर चंद्रपूर येथे ३ रुग्ण, तर भंडारा गोंदिया गडचिरोली येथील प्रत्येकी एक रुग्ण मिळून आले. यामध्ये बहुतांश रुग्ण हे बरे होऊन घरी सुद्धा गेले आहे. दरम्यान आरोग्य यंत्रणा अलर्ट झाली आहे.