Taloda News : भावासोबत फिरण्यासाठी गेला असता परतलाच नाही; वाल्हेरी धबधब्यात तरुणाचा बुडून मृत्यू

सागर निकवाडे 
नंदुरबार : तळोदा तालुक्यातील प्रसिद्ध असलेल्या वाल्हेरी धबधबा परिसरात फिरण्यासाठी गेलेल्या तरुणाचा बुडून मृत्यू झाल्याची दुर्दैवी घटना घडली आहे. फिरण्यासाठी गेला असताना पाण्यात उतरल्याने त्याला पाण्याचा अंदाज न आल्याने तरुण खोल पाण्यात बुडाला. दरम्यान दुसऱ्या दिवशी या तरुणाचा मृतदेह बाहेर काढण्यात आला आहे. 

नंदुरबारच्या तळोदा तालुक्यातील वेलदा येथे राहणारा तरुण दिगंबर प्रदीपभाई मराठे (वय २०, मूळ गाव कुकरमुंडा) असे बुडून मृत्यू झालेल्या तरुणाचे नाव आहे. तळोदा तालुक्यातील वाल्हेरी हे स्थळ सतरा किलोमीटर अंतरावर असून या ठिकाणी दोन धबधबे आहेत. या ठिकाणी जिल्ह्यातून व गुजरात राज्यातून अनेक पर्यटक फिरण्यासाठी येत असतात. तर मे महिन्यात अवकाळी पाऊस झाल्याने धबधबे प्रवाहित झाले असल्याने याठिकाणी मोठ्या प्रमाणात गर्दी उसळते. 

घरी न सांगताच गेला 

दरम्यान दिगंबर मराठे हा ऑनलाइन शैक्षणिक फॉर्म भरण्यासाठी कुकरमुंडा येथे गेला होता. मात्र तांत्रिक अडचणीमुळे काम न झाल्याने त्याने दोन दिवसांनी पुन्हा जाण्याचा विचार केला. त्यानंतर घरी न सांगता तो चुलत भाऊ अभिषेक मराठे व जय अहिर यांच्यासोबत वाल्हेरी धबधब्यावर फिरायला गेला. धबधब्यावर गेल्यानंतर ते पाण्यात उतरले. यावेळी दिगंबर खोल पाण्यात गेला आणि नजरेआड झाला. मित्रांनी शोध घेण्याचा प्रयत्न केला, पण तो आढळला नाही. 

कुटुंबीयांचा आक्रोश 

संध्याकाळपर्यंत तो न मिळाल्याने घटनेबाबत कुटुंबीयांना कळवण्यात आले. नंतर तळोदा पोलीस स्टेशनमध्ये तक्रार दाखल केली. स्थानिक तरुणांनी धबधब्याच्या खोल पात्रात शोध घेतल्यानंतर दिगंबरचा मृतदेह आढळून आला. त्याच्या कुटुंबियांनी एकच हंबरडा फोडला. इंजिनीयर बनण्याचे स्वप्न उराशी बाळगणाऱ्या होतकरू तरुणाच्या मृत्यूने परिसरात शोककळा पसरली आहे. वनविभागाच्या हलगर्जीपणामुळे या ठिकाणीदेखील अनेकांचे जीव गेले असल्याचे सांगितले जात आहे.