नागपूर : नागपूर (Nagpur) जिल्ह्यात 'व्हायरल फिवर'च्या रुग्णांमध्ये वाढ झाली आहे. सतत पडणाऱ्या मुसळधार पावसामुळं दुषित पाण्याचं प्रमाण वाढलं आहे. त्यामुळं कॉलरा, डायरिया आणि गॅस्ट्रोचे रुग्ण वाढले आहेत. नागपूर जिल्ह्यात कॉलराचे आतापर्यंत ३, डायरियाचे आठ तर, गॅस्ट्रोचे ५५ रुग्ण आढळून आले. या रुग्णांच्या संख्येमुळे घाबरण्याचं कारण नसलं तरी आरोग्य विभागानं खबरदारी घेण्याचं आवाहन करण्यात आलं आहे. (Nagpur News In Marathi )

सध्या सर्वच ठिकाणी मुसळधार पाऊस सुरू आहे. शहरी व ग्रामीण गावांना पाणीपुरवठा करणाऱ्या पाणीपुरवठा योजना, धरणे, विहिरी पाण्याने भरून गेल्या आहेत. यातूनच जलजन्य आजार वाढून आरोग्य (Health) बिघडण्याचा धोका निर्माण झाला आहे. कॉलरा, डायरिया आणि गॅस्ट्रोच्या रुग्णांमध्ये वाढ होऊ लागली आहे. सध्या जिल्ह्यात कॉलराचे आतापर्यंत ३, डायरियाचे आठ तर, गॅस्ट्रोचे ५५ रुग्ण आढळून आले आहेत. त्यामुळं जिल्हा प्रशासन सतर्क झालं आहे. त्यामुळे नागरिकांनी पाणी उकळून, गाळून व थंड करून प्यावे, असे आवाहन आरोग्य विभागातर्फे करण्यात आले आहे.

दरम्यान, पाण्याच्या दूषितपणात प्रचंड वाढ झाली आहे. त्याचा जलाशयातील जीवजंतूंवरही विपरित परिणाम होऊ लागला आहे. जवळपास ८० टक्के आजार हे दूषित पाण्यामुळे होतात. लहान मुलांना जलजन्य आजार लवकर होतात. त्यामुळं मुलांची काळजी घेण्याची गरज आहे. तसंच पाण्याच्या स्वच्छतेकडे अधिक लक्ष देण्याचा सल्ला डॉक्टरांनी दिला आहे. पावसाळा सुरू झाला की व्हायरल आजार वाढतात. त्यामुळं नागरिकांनी काळजी घेण्याची गरज आहे.