पराग ढोबळे 
नागपूर : सायबर गुन्हेगारांकडून वेगवेगळ्या पद्धतीने ऑनलाईन फसवणूक केली जात असल्याचे प्रकार समोर येत आहेत. मागील काही दिवसात तर डिजिटल अरेस्ट करण्याचे प्रकार वाढले असून नागपूरमध्ये चक्क पहलगाम हल्ल्यात तुमच्या बँक खात्यातून व्यवहार झाल्याची भीती दाखवून डिजिटल अरेस्ट करण्यात आले. यातून एका ज्येष्ठ नागरिकाची १९ लाख ५० हजार रुपयात फसवणूक करण्यात आली आहे. 

सायबर गुन्हेगार फसवणूक करण्यासाठी वेगवेगळे फंडे आजमावत आहेत. समोरच्या व्यक्तीला वेगवेगळे आमिष दाखवून फसवणूक केली जात आहे. तर कधी एखादी बनावट लिंक पाठवून फसवणूक करण्यात येत आहे. मात्र मागील काही दिवसात समोरच्या व्यक्तीला डिजिटल अरेस्ट करत भीती दाखवून गंडा घातल्याचा घटनांमध्ये वाढ झाली आहे. असाच प्रकार नागपूरमध्ये समोर आला असून या प्रकरणी पोलिसात तक्रार दाखल करण्यात आली आहे. 

डिजिटल वॉरंट दाखवत धमकी 

दरम्यान सायबर गुन्हेगारांकडून नागपुरातील एका ज्येष्ठ व्यक्तीला डिजिटल अरेस्ट करत फसवणूक केली आहे. यात पहलगाम हल्ल्यात तुमच्या बँक खात्यातून सात कोटी रुपयांचा व्यवहार झाला. यात तुम्हाला ७० लाखांचे कमिशन मिळाल्याची धमकी देत डिजिटल अरेस्ट करण्यात आले होते. यात आरोपींनी डिजिटल वॉरंट दाखवत ज्येष्ठ नागरिकाला अटकेची धमकी दिली.

ओटीपी सांगताच काढली रक्कम 

सायबर गुन्हेगाराने पहेलगाम मधील प्रकरणात सहभागी असल्याची भीती दाखवत डिजिटल वॉरंट दाखविला. यामुळे अटक टाळायची असेल तर भ्रमणध्वनीवर आलेला ओटीपी नंबर मागितला. यातून घाबरलेल्या खापेकर यांनी भीतीपोटी ओटीपी नंबर देताच सायबर ठिकाणी त्यांच्या खात्यातून १९ लाख ५० हजारांची रक्कम खात्यातून काढून घेतली. नागपूरच्या वाठोडा पोलीस स्टेशन हद्दीतील अनमोल नगर परिसरात ही घटना उघडकीस आली असून या प्रकरणी गुन्हा दाखल करण्यात आला आहे.