पराग ढोबळे, साम टीव्ही, प्रतिनिधी

Nagpur Crime : नागपूरमधून एक धक्कादायक प्रकार समोर आला आहे. नागपूरात तलवारीच्या एका अल्पवयीन मुलीचे तिच्या घरात शिरुन अपहरण करण्यात आले. आरोपीने एकतर्फी प्रेमातून तरुणीचे मध्यरात्री पळवून नेले. या घटनेमुळे गणेशपेठ परिसरात मोठी खळबळ उडाली. या प्रकरणी पोलिसांनी आरोपीविरुद्ध गंभीर गुन्हे दाखल केले आहेत.

मिळालेल्या माहितीनुसार, नागपुरातील गणेशपेठ पोलीस ठाण्याच्या हद्दीत मध्यरात्री आरोपीने एका तरुणीचे अपहरण केले. तरुणीच्या घरात घुसून तलवारीच्या धाक दाखवला आणि तिला पळवून नेले. आरोपीचा मुलीशी पूर्वी परिचय होता. तो तिच्यावर एकतर्फी प्रेम करत होता. यापूर्वी झालेल्या वादानंतर मुलीने आरोपीच्या विरुद्ध तक्रार दाखल केली होती.

अमित असे अल्पवयीन तरुणीचे अपहरण करणाऱ्या तरुणाचे नाव आहे. घटनेच्या दिवशी रात्री दोनच्या सुमारास अमित तलवार घेऊन तरुणीच्या आजीच्या घरी पोहोचला. त्याने तलवारीच्या धाकावर तिच्या आजीला धमकावले आणि घरात शिरुन तरुणीवर लग्नासाठी दबाव टाकण्याचा प्रयत्न केला. विरोध केल्याने आरोपीने तलवारीच्या धाकावर तिला जबरदस्तीने पळवून नेले.

तलवारीच्या धाकावर अल्पवयीन तरुणीचे अपहरण झाल्याची माहिती मिळाल्यानंतर गणेशपेठ पोलिसांनी तातडीने शोधमोहीम सुरु केली. गणेशपेठ पोलिसांनी आरोपी अमितला ताब्यात घेतले आणि अल्पवयीन मुलीची सुटका केली. या प्रकरणी पोलिसांनी आरोपीच्या विरोधात गंभीर गुन्हे दाखल करुन त्याला अटक केली आहे.