Maharashtra Politics : शिंदे गटाकडून भाजपला 'दे धक्का', बड्या नेत्याचा पदाधिकारी, कार्यकर्त्यांसह शिंदेसेनेत प्रवेश

Maharashtra : स्थानिक स्वराज्य संस्थांच्या निवडणुका लवकरच जाहीर होतील असे संकेत आहेत. राज्यात नुकतेच जिल्हा परिषद अध्यक्ष, उपाध्यक्ष आणि पंचायत समितीच्या सभापती यांच्या आरक्षणाचा जीआर जाहीर झाले आहे. त्यामुळे येत्या काही दिवसात आगामी निवडणुकींसंबंधित घोषणा केली जाईल अशी शक्यता वर्तवली जात आहे. निवडणुकीच्या पार्श्वभूमीवर भाजपला शिंदे गटाकडून धक्का दिला आहे.

मिळालेल्या माहितीनुसार, भारतीय जनता पक्षाच्या कामगार मोर्चाचे प्रदेश सचिव मनोज राणे यांनी भाजपमधून बाहेर पडण्याचा निर्णय घेतला आहे. त्यांनी उपमुख्यमंत्री एकनाथ शिंदे यांच्या शिवसेना शिंदे गटात प्रवेश केला आहे. मंत्री नितेश राणे यांचे खंदे कार्यकर्ते अशी मनोज राणे यांची ओळख आहे. त्यांनी शिंदेसेनेत प्रवेश केल्याने भाजपला धक्का बसला असे मानले जात आहे.

मनोज राणे यांनी त्यांचे पदाधिकारी आणि कार्यकर्त्यांसह शिवसेना शिंदे गटामध्ये प्रवेश केला आहे. या पक्षप्रवेशामुळे मीरा-भाईंदर आणि आसपासच्या परिसरात शिंदे गटाची शक्ती वाढली आहे. शिंदे गटातील नेते आणि राज्याचे परिवहन मंत्री प्रताप सरनाईक यांच्या मार्गदर्शनाखाली मनोज राणे यांनी शिवसेनेमध्ये प्रवेश केला आहे.

विधानसभा निवडणुकीनंतर इतर पक्षांमधून भाजपमध्ये इनकमिंग सुरु असल्याचे चित्र पाहायला मिळत होते. पण स्थानिक स्वराज्य संस्थांच्या निवडणुकांपूर्वी नेत्यांनी भाजपमधून इतर घटक पक्षांमध्ये प्रवेश करायला सुरुवात केल्याचे म्हटले जात आहे. निवडणुका होईपर्यंत हे इनकमिंग आणि आउटगोईंग प्रकरण सुरु राहणार असल्याचे बोलले जात आहे.