यंदा राज्यात पाऊस मे महिन्यात दाखल झाला असून जुलै महिन्याच्या सुरवातीपासूनच पावसाचा जोर कायम आहे. महाराष्ट्राची दुसरी राजधानी असलेल्या नागपूर शहराला रविवारपासून पावसाने झोडपले. रविवारपासून सुरु झालेल्या या पावसाने सलग चौथ्या दिवशीही जोरदार बॅटिंग केली आहे. अतिवृष्टीमुळे विद्यार्थ्यांची गैरसोय होऊ नये म्हणून शाळा बंद ठेवण्याचा निर्णय घेण्यात आला आहे. नागपूरसह भंडारा, गोंदिया, चंद्रपूर, गडचिरोलीला आज सलग चौथ्या दिवशी पावसाचा ऑरेंज अलर्ट देण्यात आला आहे.सततच्या मुसळधार पावसामुळे येथील जनजीवन विस्कळीत झाले आहे.

रविवारपासून सुरु झालेल्या पावसाने विदर्भाला झोडपून काढले आहे. सततच्या मुसळधार पावसामुळे नागपूर, भंडारा, गोंदिया, चंद्रपूर, गडचिरोलीतील जनजीवन विस्कळीत झाले आहे. सलग तीन दिवस सुरू असलेल्या पावसामुळे नागनदी, पोहरानदी, आणि पिवळी नदीला पूर आल्याने ५० हून अधिक वस्त्यांमध्ये पाणी शिरले आहे.शहरातील २३ प्रमुख रस्त्यांवर पाणी साचल्याने नदीचे स्वरूप आले होते. गेल्या २४ तासात नागपूर शहरात ९५.६ मिलिमीटर तर जिल्ह्यात १३९.६ मिलिमीटर पाऊस पडला.

या मुसळधार पावसात ११ जनावरे मृत पावली असून ४५३ घराचे नुकसान झाले आहे. अतिवृष्टीमुळे निर्माण झालेल्या परिस्थितीचा सामना करण्यासाठी गडचिरोली आणि नागपूर येथे २ हेलिकॉप्टरसह भारतीय सैन्य दल सज्ज झाले आहे. जिल्हाधिकाऱ्यांच्या सूचनेनुसार मदत व बचाव कार्यासाठी संपूर्ण यंत्रणा सज्ज ठेवण्यात आल्याची माहिती विभागीय आयुक्तांनी दिली.

हवामान खात्याने आज पाचही जिल्ह्यात मुसळधार पावसाचा अंदाज वर्तवला असून ऑरेंज अलर्ट जारी केला आहे. अमरावती, यवतमाळ, वाशीम, अकोला, बुलढाणा जिल्ह्यांना पावसाचा यलो अलर्ट देण्यात आला आहे. भंडारा जिल्ह्यात हवामान विभागानं रेड अलर्ट दिला आहे.तीन दिवसांपासून जिल्ह्यात सर्वत्र मुसळधार पाऊस पडतो आहे.

परिणामी, भंडारा जिल्हाधिकाऱ्यांनी मुसळधार पावसाच्या शक्यतेने भंडारा, चंद्रपूर जिल्ह्यातील ब्राम्हपुरी तालुक्यातील शाळांना तसेच महाविद्यालयांना सुट्टी जाहीर केली आहे. तर गडचिरोली जिल्ह्यातील काही शाळांना गुरुपौर्णिमा निमित्त सुट्टी देण्यात आली आहे. जिल्ह्यातील ९० मार्ग पाण्याखाली आल्याने वाहतुकीसाठी बंद करण्यात आले आहेत.