पराग ढोबळे 
नागपूर : रामटेक- तुमसर महामार्गावरील राखी तलाव चौकात भीषण अपघात झाला. दुचाकीस्वाराला वाचविण्याच्या प्रयत्नात हा अपघात झाला असून या अपघातात कारच्या धडकेत एकाचा मृत्यू झाला असून गॅरेजमध्ये असलेले चार जण गंभीर जखमी झाले आहेत. हि घटना शनिवारी घडली आहे.

नागपूरमधील (Nagpur) रामटेक- तुमसर महामार्गावर गोंदिया येथील भारतीय जीवन विमा निगम (एलआयसी) च्या अधिकाऱ्याची कार गोदिया वरुन रामटेकच्या दिशेने निघाली होती. सदरची कार रामटेक बायपास येथील राखी तलाव चौकात आली असता मोटरसायकल चालकाला वाचविण्याच्या प्रयत्नात कार चालकाचे कारवरील (Accident) नियंत्रण सुटले. यानंतर कारने चौकालगत असलेल्या भेलपुरीच्या ठेल्याला धडक देत पुढे कार मोटारसायकल रिपेरिंग गॅरेजला जाऊन आदळली.

या अपघातात भेलपुरी ठेल्याजवळ उभे असलेले लखन शेखर भोसले (वय ३५) यांना जोरदार धडक बसल्याने त्यांचा जागीच मृत्यू झाला आहे. तर गॅरेजमध्ये मोटार सायकलची रिपेंरिग करीत असलेले देवलापार स्टेशनचे पोलिस शिपाई रविद्र उदाराम मेश्राम (वय ४४), प्रगती अनिकेत चौके (वय २७), धनंजय मनोहर होळकर (वय ४८),  विशाल कवडू कोडापे (वय २७) हे चौघे गंभीर जखमी झाले. त्यांना लागलीच उपचारासाठी रुग्णालयात दाखल करण्यात आले आहे.