Nagpur News: नागपूर येथून एक हृदयद्रावक घटना समोर आली आहे. मुलाखतीसाठी निखालेल्या तीन व्यक्तींवर काळाने घाला घातला आहे. दुचाकीवरुन जात असताना कारची जोरदार धडक बसल्याने या तिघांचा मृत्यू झाला आहे. सदर घटनेमुळे परिसरात हळहळ व्यक्त केली जात आहे. (Latest Nagpur News)

मिळालेल्या अधिक माहितीनुसार, नागपूर-अमरावती मार्गावरील कोंढाळी येथे हा भीषण अपघात झाला. या अपघातात सुषमा वाघाडे, प्रतीक्षा वाघाडे आणि रोशन शहारे या तिघांना आपला जीव गमवावा लागला आहे. घटना घडली तेव्हा दोन महिलांचा जागीच मृत्यू झाला होता. मात्र रोशन यात बचावला होता. त्याला तात्काळ जवळच्या रुग्णालयात दाखल करण्यात आले होते. मात्र हे उपचार अपयशी ठरले आणि त्याची प्राण ज्योत मालवली.

मुलाखतीसाठी जाताना काळाची झडप

सुषमा वाघाडे, प्रतीक्षा वाघाडे आणि रोशन शहारे हे तिघेही एका खाजगी कंपनीत मुलाखतीसाठी जात होते. यावेळी प्रवासासाठी त्यांनी दुचाकी निवडली. एकाच दुचाकीवरून हे तिघेही प्रवास करत होते. नोकरीच्या शोधात घरातून निघालेले हे तिघेही आनंदाची बातमी घेऊन येतील याकडे कुटुंबीयांचे डोळे लागले होते.

मात्र नियतीच्या मनात काही भलतंच होतं. तिघेही घरी आले मात्र आनंदाची नाही तर दु:खाची बातमी घेऊन. एकाच गावातील तिघांचा अपघाती मृत्यु झाल्याने चमेली गावात शोककळा पसरली आहे.