राज्यात सध्या महिला अत्याचारांवरील घटनांमध्ये वाढ झाली आहे. पुण्यात स्वारगेट डेपोत शिवशाही बसमध्ये झालेल्या बलात्कार प्रकरणानंतर रायगड जिल्ह्यातून एक धक्कादायक घटना समोर येत आहे. एका सुटकेसमध्ये कोंबलेला महिलेचा मृतदेह आढळल्यानं परिसरात खळबळ उडाली आहे. हा मृतदेह नेमका कुणाचा आहे? याचा तपास पोलीस करीत आहेत.

रायगड जिल्ह्यातील पेणमधून एक धक्कादायक घटना समोर येत आहे. पेणमध्ये एक अज्ञात सुटकेस सापडला. त्या सुटकेसमध्ये एका महिलेचं मृतदेह आढळला आहे. सुटकेसमध्ये मृतदेह आढळल्यानं परिसरात खळबळ उडाली आहे. दुरशेत गावाच्या हद्दीत बाळगंगा नदी किनारी हा सुटकेस सापडला.

परिसरात दुर्गंधी पसरल्यानं ग्रामस्थांनी तपासणी केली. तेव्हा अज्ञात सुटकेस आढळला. अज्ञात सुटकेस उघडून पाहिल्यानंतर ग्रामस्थांना धक्काच बसला. सुटकेसमध्ये मृतदेह आढळल्यानं ग्रामस्थांनी थेट पोलिसांना याची माहिती दिली. पोलीस थेट गावात दाखल झाले. या प्रकरणी पेण पोलिस ठाण्यात तक्रार नोंद करण्यात आली आहे.

सुटकेसमधील महिलेचे वय ३०-४० असल्याचा अंदाज पोलिसांनी व्यक्त केला असून, ५-७ दिवसांपूर्वी महिलेची हत्या झाली असल्याचा अंदाज पोलिसांनी व्यक्त केला आहे. याप्रकरणी पोलीस अधिक तपास करीत आहेत.