मयुरेश कडव
मुरबाड : राज्यात अवकाळी पावसाचे थैमान सुरु आहे. विजांच्या कडकडाटासह पावसाचे आगमन होत आहे. रविवारी मुरबाड तालुक्यात देखील गारपिटीसह मुसळधार पावसाने हजेरी लावली. याचवेळी घराकडे जात असताना अंगावर वीज पडून एका तरुणीचा मृत्यू झाला. तर तिचे वडील गंभीररित्या जखमी झाले आहेत. त्यांच्यावर सध्या रुग्णालयात उपचार सुरु आहेत. 

मुरबाड तालुक्यातील अल्याणी गावातील रवीना सांडे (वय १८) असे मृत झालेल्या तरुणीचे नाव आहे. दरम्यान राज्यातील अनेक भागात मागील दोन- तीन दिवसांपासून अवकाळी पाऊस होत आहे. वादळी वारा तसेच गारपिटीसह जोरदार पाऊस होत आहे. यामुळे प्रचंड नुकसान होत आहे. तर काही ठिकाणी वीज पडण्याच्या घटना देखील घडल्या आहेत. त्यानुसार रविवारी झालेल्या अवकाळी पावसात मुरबाड तालुक्यात वीज पडल्याची घटना घडली. 

रविवारी संध्याकाळी मुरबाड तालुक्यातील टोकावडे, धसई परिसराला गारपिटीने झोडपून काढले. धसई गावाजवळील अल्याणी गावातील १८ वर्षीय रवीना सांडे ही वडील राजाराम सांडे यांच्यासोबत अल्याणीहून धसईकडे जाण्यासाठी निघाले होते. याच वेळी ढगाळ वातावरण होऊन पावसाला सुरवात झाली असताना अचानक जोरदार आवाज होऊन वीज कोसळली. 

वीज कोसळताच होत्याचे नव्हते झाले 

जोरदार आवाज होऊन रविना हिच्या अंगावर वीज पडली. यात ती गंभीररीत्या भाजली गेली होती. यानंतर तिला तत्काळ टोकावडे येथील ग्रामीण रुग्णालयात उपचारासाठी नेण्यात आलं. मात्र डॉक्टरांनी तिला मृत घोषित केलं. तर तिच्यासोबत असलेले तिचे वडील देखील यात गंभीरपणे जखमी झाले असून त्यांच्यावर सध्या उपचार सुरु आहेत.