फैय्याज शेख 
मुरबाड : मुरबाड तालुक्यातील टोकावडे पोलिस ठाण्याच्या हद्दीत असलेले धसई परिसरात बुधवारी रात्री एका घरावर सशस्त्र दरोडा टाकण्यात आला आहे. दरोडेखोरांनी शस्त्राचा धाक दाखवून घरातून दीड तोळे सोने व २० हजार रुपयांची रोख रक्कम घेऊन पसार झाले आहेत. दरम्यान या प्रकरणी टोकावडे पोलिसात गुन्हा दाखल करण्यात आला असून पोलिसांकडून तपास सुरु करण्यात आला आहे. 

मुरबाड तालुक्यातील धसई गावातील म्हसा रोडलगत बुधवारी रात्रीच्या सुमारास हा दरोडा टाकण्यात आला आहे. यामुळे भागात भीतीचे वातावरण पसरले आहे. दरम्यान धसई येथे राहणाऱ्या जगदीश गोल्हे यांच्या घरात ५ ते ६ दरोडेखोरांनी रात्रीच्या सुमारास घरात प्रवेश केला. यानंतर घरातील सदस्यांना शस्त्राचा धाक दखवत दीड तोळे सोने आणि सुमारे २० हजार रुपयांचा ऐवज लुटून पसार झाले आहेत. 

दरोडेखोरांनी घरात घुसून घरातील सदस्यांना चॉपरचा धाक दाखवून धमकावून लूटमार केली. या धाडसी कृत्यामुळे गोल्हे कुटुंबीय पुर्णपणे हादरून गेले आहेत. लूटमार केल्यानंतर दरोडेखोर पसार झाल्यावर गोल्हे कुटुंबीयानी आरडाओरड केली. आवाज एकूण आजूबाजूच्या परिसरातील नागरिक जमा झाले. यानंतर घटनेची माहिती पोलिसांना देण्यात आली. माहिती मिळताच टोकावडे पोलीस ठाण्याचे अधिकारी तत्काळ घटनास्थळी दाखल झाले. 

दरोडेखोर सीसीटीव्ही कॅमेरात कैद 

दरम्यान घरात प्रवेश करताना दरोडेखोर सीसीटीव्ही कॅमेरात कैद झाले आहे. परिसरातील सीसीटीव्ही फुटेजची तपासणी केली असता चोरट्यांनी याच परिसरातील एका बंगल्यातही कंपाउंडवरून आत शिरण्याचा प्रयत्न केला होता. सुदैवाने तेथे प्रवेश करण्यात ते अपयशी ठरले असून संपूर्ण प्रकार सीसीटीव्हीत कैद झाला आहे. या सशस्त्र दरोड्यामुळे धसई परिसरातील नागरिकांमध्ये भीतीचे वातावरण पसरले आहे. नागरिकांनी पोलीस प्रशासनाकडे रात्री गस्त वाढवण्याची आणि परिसरात टेहळणी वाढवण्याची मागणी केली आहे.