>> संजय गडदे, साम टीव्ही

Mumbai News : मुंबईत दोन दिवसांपासून जोरदार पावसाने हजेरी लावली आहे. अनेक ठिकाणी पावसासोबत आलेल्या वादळी वाऱ्यामुळे मोठ्या प्रमाणात नुकसानीच्या घटना घडल्या आहेत. मुंबईच्या गोरेगाव पश्चिमेकडील एमजी रोड परिसरात देखील मुसळधार पावसामुळे एक झाड कोसळ्याची घटना घडली आहे.

या दुर्घटेत ३० वर्षीय तरुणाचा मृत्यू झाला आहे. प्रेमलाल निर्मल असं मृत तरुणाचं नाव आहे. झाड कोसळून व्यक्तींचा मृत्यू होण्याची आज दिवसभरातील ही दुसरी घटना आहे.

पहाटेपासूनच मुंबईत मुसळधार पावसाला सुरुवात झाली आहे. पावसासोबत जोरदार वारा देखील वाहत असल्याने जुनाट झाडं कोसळल्याच्या घटना समोर येत आहेत. गोरेगाव एमजी रोड परिसरातील मीठानगर महापालिका कॉलनीत दुपारच्या सुमारास एका घरावर झाड कोसळल्याची घटना घडली. (Marathi Tajya Batmya)

या दुर्घटनेत बी 22 ए या घरात राहणाऱ्या 30 वर्षीय प्रेमलाल निर्मल या तरुणाला गंभीर दुखापत झाली. शेजारी राहणाऱ्या नागरिकांनी गंभीर जखमी अवस्थेत त्याला जवळच असलेल्या खाजगी रुग्णालयात उपचारासाठी दाखल केले. मात्र तेथील डॉक्टरांनी तपासून त्याला मृत घोषित केले. याप्रकरणी पोलिसांनी अपघाती मृत्यूची नोंद केली असून गोरेगाव पोलीस पुढील तपास करत आहेत. (Latest Political News)

मुंबईत मुसळधार पावसामुळे झाडे कोसळून दुर्घटना घडण्याची ही आज दिवसभरातील दुसरी घटना आहे. पहाटे देखील मालाड पश्चिमेकडील मामलेदार वाडी परिसरात झाड कोसळून कौशल महेंद्र जोशी या 33 वर्षीय तरुणाचा मृत्यू झाला आहे. (Latest Marathi News)