स्नेहील झणके, साम टीव्ही

मुंबई : आता जर हे ऐकून तुम्हाला वाटत असेल की ही घटना महाराष्ट्राच्या बाहेरची आहे तर तो तुमचा गैरसमज आहे. मस्तवालपणे मराठी गया तेल लगाने असं मग्रुरीत म्हणणारा हा महाराष्ट्रातल्या मुंबईत बसून आपल्या मराठीचा अपमान करतोय. मुंबईतील पवईमधील एल अँण्ड टीमध्ये हा सुरक्षा रक्षक मराठीला नाकारत नाहीये तर धुडकावतोय.

राज ठाकरेंनी ही घोषणा केल्याच्या अवघ्या २४ तासात मराठी गया तेल लगाने म्हणणारा या हा व्हिडीओ समोर आला आणि मनसैनिकांनी राज आदेशाचं तंतोतंत पालन केलं.

दुसरीकडे मनसेने मराठीसाठी पुन्हा आक्रमक होत बँकामधील व्यवहार मराठीत होतो का हे पाहण्यासाठी ठाण्यातील अनेक बँकांमध्ये धडक दिली. यावेळी बँकांचे कामकाज आणि कर्मचारी मराठी असावेत असं निवदेन मनसेच्या वतीनं देण्यात आलं. गुढीपाडवा मेळाव्यात राज ठाकरेंनी आगामी महापालिका निवडणुकांच्या पार्श्वभूमीवर पुन्हा एकदा मराठीचा राग आळवलाय. असं असलं तरी परप्रांतीयांच्या मुजोरीपणामुळे मराठीला महाराष्ट्रातच न्याय मागण्याची वेळ आली आहे. अभिजात भाषेचा दर्जा मिळूनही आपुल्याच घरात हाल सोसते मराठी असंच चित्र सध्या महाराष्ट्रात आहे.