>>संजय गडदे

Mumbai News : मुंबईतील प्रसिद्ध जुहू चौपाटीवर होळी खेळायला जाणे एका तरुणाच्या जीवावार बेतले आहे. धूलिवंदनाच्या निमित्ताने जुहू चौपाटीवर गेलेल्या लोकांपैकी एका तरुणाचा समुद्रात बुडून मृत्यू झाल्याची दुर्दैवी घटना घडली आहे. अंधेरी पश्चिमेकडील प्रसिद्ध जुहू समुद्र चौपाटीवर मंगळवारी ही घटना घडली आहे.

धूलिवंदनाचा सण असल्याने मंगळवारी मुंबईतील समुद्रकिनाऱ्यावर शहराच्या कानाकोपऱ्यातून नागरिकांनी मोठ्या प्रमाणावर गर्दी केली होती. दरम्यान सायंकाळी सव्वा सहा वाजण्याच्या सुमारास एक 26 वर्षीय तरुण समुद्रात होण्यासाठी गेला. परंतु पाण्याचा अंदाज न आल्याने तो समुद्रात बुडू लागला. (Latest Marathi News)

घटनेची माहिती मिळताच पोलीस कर्मचारी, अग्निशमन दलाचे जवान आणि इतर अधिकारी घटनास्थळी दाखल झाले. बचाव पथकांनी तरुणाचा शोध सुरू केला. काही वेळातच बचाव पथकांनी बुडणाऱ्या तरुणाला बाहेर काढले आणि जवळच असलेल्या महापालिकेच्या कुपर रुग्णालयात दाखल केले. मात्र तिथे डॉक्टरांनी त्या तरुणाला तपासून मृत घोषित केले. याप्रकरणी सांताक्रुज पोलिसांनी एडीआर दाखल केला आहे. पोलीस अधिक तपास करत आहे. (Mumbai News)