स्वप्नांना बळ देण्यासाठी फक्त इच्छाशक्ती आणि सातत्य महत्त्वाचे असते. जर तुमची इच्छा असेल आणि त्यादृष्टीने तुम्ही अभ्यास केला तर तुम्हाला नक्कीच यश मिळते. असंच काहीसं मोहिनी अनिल गोळे-किर्दत यांच्याबाबतीत घडलं. त्यांनी महाराष्ट्र राज्य लोकसेवा आयोगाची परीक्षा सलग तीन वेळा क्रॅक केली आहे. त्यांच्या या यशाचे त्यांच्या कुटुंबियांना खूपच कौतुक आहे.

मोहिनी या मूळच्या साताऱ्याच्या रहिवासी. त्यांनी अभ्यासाला नेहमीच प्राथमिक स्थान दिले. त्या वालूथ गावात लहानाच्या मोठ्या झाल्या.

मोहिनी यांची वडिलांनी पीठाची गिरणी होती. या गिरणीतून होणाऱ्या कमाईतून त्यांचे घर चालायाचे. त्यांची आई लहान मोठी कामे करत संसाराला हातभार लावत. परिस्थिती कशीही असली तरी त्यांनी आपल्या तिन्ही मुलांच्या शिक्षणात कोणतीही अडचण येऊ दिली नाही.

मोहिनी यांचे शिक्षण

मोहिनी यांनी प्राथमिक शिक्षण हे वालूथ जिल्हा परिषदेच्या शाळेत घेतले. त्यानंतर त्यांनी ८ ते१० वीपर्यंतचे शिक्षण न्यू इंग्लिसश स्कूल हुमगाव येथे घेतले. दहावीमध्ये त्यांचा शाळेत पहिला नंबर आला होता. त्यांनी ११ आणि १२वीचे शिक्षण यशवंतराव चव्हाण इन्स्टिट्यूट सायन्स येथे घेतले.

उच्च शिक्षणासाठी त्यांनी साताऱ्यातील कर्मवीर भाऊराव पाटील कॉलेजमध्ये अॅडमिशन घेतले. येथे त्यांनी सिव्हिल इंजिनियरिंग पदवी प्राप्त केली. यानंतर त्यांनी एमपीएससी परीक्षेची तयारी केली. त्यांनी एमपीएससी परीक्षेत यश मिळवत सार्वजनिक बांधकाम विभागात सहाय्यक अभियंता पदावर नियुक्ती मिळवली.

२०२४ मध्ये त्यांनी पुन्हा एकदा एमपीएससी परीक्षा पास केली आहे. यानंतर त्यांनी जिल्हा परिषद ठाणे येथे जलसंधारण अधिकारी म्हणून निवड झाली आहे. मुलीच्या या यशामुळे आईवडिलांना खूपच आनंद झाला आहे.