तन्मय टिल्लू, साम टीव्ही प्रतिनिधी

काम करा मात्र अहंकार बाळगू नको, असं आवाहन सरसंघचालक मोहन भागवत यांनी राजकारण्यांना केलंय. तर जे अहंकार बाळगत आहेत त्यांना सत्तेवरून बाजूला काढा, असं आवाहन संजय राऊत यांनी मोहन भागवत यांना केलंय.. तसंच मोहन भागवत यांच्याच आशीर्वादानंच सरकार सुरू असल्याचंही राऊतांनी म्हटलंय.

पंतप्रधान मोदी यांच्या नेतृत्वाखाली एनडीएचं सरकार अस्तित्वात आल्यानंतर दुसऱ्याच दिवशी राष्ट्रीय स्वयंसेवक संघानं केंद्र सरकारचे कान पिळलेत.नागपूरमध्ये रेशीमबाग मैदानात झालेल्या कार्यक्रमाला संबोधित करताना सरसंघचालक भागवतांनी विविध मुद्द्यांवर भाष्य केलं. यावेळी हिंसाचारानं होरपळत असलेल्या मणिपूरात शांतता प्रस्थापित करण्याची सूचना भागवतांनी केली. त्यासह सहमतीनं देश चालवा असा टोला त्यांनी सरकारला लगावला.

एकीकडे लोकसभा निवडणूक सुरु असताना भाजपचे राष्ट्रिय अध्यक्ष जे,पी.नड्डांनी संघाची आता भाजपला गरज नसल्याचं म्हटलं होतं. त्यावरुन बरीच राळ उठली होती. त्यात आता सरसंघचालक डॉ. मोहन भागवतांनी भाजप आणि पंतप्रधान मोदींना जोरदार कानपिचक्या दिल्यात. त्यामुळे लोकसभा निवडणुकी दररम्यान आणि त्यानंतर आलेल्या निकालाबद्दल राष्ट्रीय स्वयंसेवक संघ नाराज आहे का? असा प्रश्न या निमित्याने उपस्थित होऊ लागला आहे. याआधीही भागवतांनी मोदी सरकारच्या न पटलेल्या धोरणांवर टीका केल्याच दिसून आलंय. त्यातच भाजपची मातृसंस्था असलेल्या संघानचं भाजपला कानपिचक्या दिल्यानं विरोधकांना आयतं कोलीत मिळालंय.

दहा वर्षांपासून भाजप पूर्ण बहुमतात असलेलं मोदी सरकार होतं. मात्र आता केंद्रात मोदींच्या नेतृत्वाखालील एनडीए सरकार अस्तित्वात आलंय. त्यामुळे मित्रपक्षांच्या सहमतीनं सरकार चालवणं गरजेचं आहे. अशावेळी सरसंघचालकांनी संसदही सहमतीनं चालवण्याचा कानपिचक्या दिल्यानं आता केंद्रीय नेतृत्वाच्या कार्यशैलीकडे लक्ष लागलंय.