राज्यातील सामान्य नागरिकांसह राजकारण्याचं लक्ष सध्या ठाकरे बंधूंच्या युतीवर आहे. ठाकरे कुटुंबातील कलहावर पडदा पडणार का? असा प्रश्न प्रत्येकालाच पडलाय. एकिकडे सत्ताधारी नेते मंडळी ही युती होणं अशक्य म्हणत आहेत. तर, दुसरीकडे राज ठाकरे यांच्या निवासस्थानाजवळ भाजपकडून बॅनरबाजी करण्यात आली आहे. याच बॅनरला मनसेनं प्रत्युत्तर दिलंय. हिंदी सक्तीवरून हे बॅनर वॉर सुरू असून, या बॅनरची चर्चा सध्या राजकीय वर्तुळात रंगली आहे.

भाजपने २१ एप्रिलला हिंदी भाषेच्या सक्तीवरून दादरला बॅनर लावले होते. हे बॅनर त्यांनी राज ठाकरे यांच्या बंगल्याजवळील हाकेच्या अंतरावर लावले होते. 'ही नव्हे भाषेची सक्ती..ही तर महाराष्ट्राची भक्ती' अशा आशयाचे बॅनर लावण्यात आले होते. या बॅनरला आता मनसेनं प्रत्युत्तर बॅनरद्वारेच दिलं आहे.

'हिंदी ही भाजपची भक्ती नव्हे तर, सक्ती आहे', अशा आशयाचे बॅनर मानखुर्दमधील अनेक चौकात लावण्यात आल्याचे दिसत आहे. विशेष म्हणजे हे बॅनर भाजपकडून लावण्यात आलेल्या बॅनर शेजारीच लावण्यात आले आहेत. हिंदी भाषेच्या सक्तीवरून दादरमध्ये भाजप आणि मनसेमध्ये बॅनर वॉर सुरू असून, जर ठाकरे बंधूंमध्ये युती झाली तर, भाजप आणि मनसेमध्ये मिठाचा खडा पडणार का? असा प्रश्न निर्माण झाला आहे.

ठाकरे बंधू परदेशात

ठाकरे बंधूंच्या युतीवरून राज्यातील राजकारणामध्ये अनेक तर्क वितर्क लावण्यात येत आहे. अशातच राज ठाकरे विदेश दौऱ्यावर असताना उद्धव ठाकरेही परदेशात जाणार असल्याची माहिती समोर आली आहे. त्यामुळे दोन्ही चुलत भावांमध्ये परदेशात युतीची चर्चा होणार का? असा प्रश्न उपस्थित झाला आहे.