Raj Thackeray News: मनसे अध्यक्ष राज ठाकरे यांनी राज्यातील घडामोडींवरून राजकीय नेत्यांवर आगपाखड केली आहे. 'कुणाच्या हातात काही राहीलं नाही, अजूनही निवडणुका होत नाहीत. लोक मोबाईल फोनवर राग व्यक्त करतात आणि शांत होतात. पण लोक रस्त्यावर येणार नाहीत, तोपर्यंत राजकारणी वठणीवर येणार नाहीत, अशा शब्दात राज ठाकरे यांनी राज्यातील राजकीय घडामोडींवरून टीकास्त्र सोडलं आहे. (Latest Marahi News)

मनसे अध्यक्ष राज ठाकरे हे कोकण दौऱ्यावर आहेत. काल राज ठाकरे हे चिपळूण येथे गेले होते. त्यावेळी ठाकरे यांनी कार्यकर्त्यांशी संवाद साधला. संवाद साधताना कार्यकर्त्यांना संघटना बांधणीच्या सूचनाही दिल्या. त्यानंतर राज ठाकरे आज दापोलीत असून यावेळी प्रसार माध्यामांशी बोलताना राज्यातील परिस्थितीवरून राजकीय नेत्यांवर सडकून टीका केली.

राज्यातील राजकीय पस्थितीवर भाष्य करताना राज ठाकरे म्हणाले, 'लोकांच्या मनात संताप आहे. या गोंधळाच्या आधीच माझा कोकण दौरा ठरला होता. हा गोंधळ झाला म्हणून दौरा केला नाही. पदाधिकाऱ्यांमध्ये बदल करायचे होते, ते झाले आहेत. कार्यकर्त्यांना कामाला लागण्यासाठी सूचना दिल्या आहेत'.

'निवडणुकीआधी कुणाबरोबर युती आणि नंतर कुणाबरोबर जातात. मी या प्रकारची प्रतारणा करणार नाही. राजकारणी कसे रंग बदलतात, याकडे लोकांनी बघणे गरजेचे आहे. मी व्याभिचारी राजकारण करणार नाही, असेही राज ठाकरे म्हणाले.

'कोकणातील जनतेनं विचार केला पाहीजे. त्याच-त्याच पक्षांना निवडून दिल्यानं काय झालं, याचा अंदाज येत नसेल तर भीषण आहे. गलिच्छ राजकारण सुरु आहे. कुणाच्या हातात काही राहीलं नाही, अजूनही निवडणुका होत नाहीत. लोक रस्त्यावर येणार नाहीत, तोपर्यंत राजकारणी वठणीवर येणार नाहीत. महाराष्ट्रात जे सुरु आहे, ते पाहून मी कुणासोबत जाणार नाही, असे राज ठाकरे पुढे म्हणाले.