सुशील थोरात, अहिल्यानगर प्रतिनिधी

श्रीगोंदा शहरातील वडाळी रस्त्यालगतच्या जंगल परिसरात जळालेल्या अवस्थेत आढळलेल्या अल्पवयीन मुलीच्या मृतदेहाची ओळख पटविण्यात श्रीगोंदा पोलिसांना यश आले आहे. या मुलीचा खून करून मृतदेह जाळत पुरावा नष्ट करण्याचा प्रयत्न करणाऱ्या पिता-पुत्राला पोलिसांनी अटक केली आहे. या घटनेमुळे श्रीगोंदा तालुक्यात मोठी खळबळ उडाली आहे.

आरोपी शुभम सुखदेव ओव्हाळ याचे मृत अल्पवयीन मुलीसोबत प्रेमसंबंध होते. १५ जून रोजी दुपारी चारित्र्याच्या संशयावरून त्यांच्यात वाद झाला. या वादातून संतापाच्या भरात शुभम ओव्हाळ याने लोखंडी रॉड आणि फरशीने मुलीवर हल्ला करून तिच्या डोक्यात गंभीर दुखापत केली. या जीवघेण्या मारहाणीत मुलीचा मृत्यू झाला.

खून केल्यानंतर आरोपीने मृतदेह घरातच लपवून ठेवला आणि केडगाव येथे राहणाऱ्या आपल्या आई-वडिलांना या घटनेची माहिती दिली. त्यानंतर आरोपी आणि त्याचे वडील सुखदेव ओव्हाळ हे श्रीगोंद्यात आले. त्यांनी मृतदेह गादीमध्ये गुंडाळून दोरीने बांधला आणि पुरावा नष्ट करण्याच्या उद्देशाने वडाळी रोडवरील जंगल परिसरात नेला. तिथे लाकडे गोळा करून आणि मृतदेहावर पेट्रोल टाकून तो जाळल्याचा आरोप त्यांच्यावर आहे.

या घटनेची गोपनीय माहिती पोलिसांना मिळाल्यानंतर त्यांनी तत्काळ तपास सुरू केला. पहाटे वडाळी रोड परिसरातील जंगलात पोलिसांना जळालेला मृतदेह आढळून आला. त्यानंतर पोलिसांनी तपासाची चक्रे वेगाने फिरवत आरोपी शुभम ओव्हाळ आणि त्याचे वडील सुखदेव ओव्हाळ या दोघांना त्यांच्या राहत्या घरातून ताब्यात घेतले आहे.