संदिप भोसले, साम टीव्ही

राज्यात जिल्हा परिषद आणि पंचायत समितीच्या निवडणुकीची रणधुमाळी सुरू आहे. नेतेमंडळी विविध भागात प्रचाराला जात आहेत. काही मंत्री विमानाने सभास्थळी जात आहेत. याचदरम्यान काही दिवसांपूर्वी पंकजा मुंडे यांच्या विमानात तांत्रिक बिघाड झाला होता. त्यानंतर आता मंत्री गुलाबराव पाटलांचं हवाई उड्डाण अचानक रद्द करण्यात आलं. त्यानंतर रस्तेमार्गे कारने पुढच्या दिशेला निघाले.

मंत्री गुलाबाव पाटील हे लातूर दौऱ्यावर आहेत. ते लातूरवरून विमानाने छत्रपती संभाजीनगरला जाणार होते. या प्रवासाठी मंत्री गुलाबराव पाटील यांनी संपूर्ण तयारी केली. परंतु त्यांच्या विमानाला लातूरमध्ये क्लिअरनेस मिळाला नाही. त्यामुळे त्यांना अचानक कारने छत्रपती संभाजीनगरला जावे लागले. खरंतर त्यांच्या विमानाने दोन वेळेस उड्डाण घेतले होते. परंतु क्लिअरनेस मिळत नसल्याने उड्डाण रद्द करण्यात आलं.

Avocet एव्हिएशन कंपनीचे सहा आसन क्षमतेचं हे विमान होतं. हैदराबाद ,बिदर आणि चेन्नई या ठिकाणावरून क्लिअरन्स आला नसल्यामुळे लातूर विमानतळावरून उड्डाण रद्द करण्यात आल्याची माहिती आहे. मंत्री गुलाबराव पाटील हे लातूर विमानतळावरून साडेचारच्या दरम्यान उड्डाण करणार होते.

तत्पूर्वी, पंकजा मुंडे यांच्या हेलिकॉप्टरमध्ये काल तांत्रिक बिघाड झाला. त्या छत्रपती संभाजीनगरवरून लातूरच्या दिशेने निघाल्या होत्या. लातूर दौऱ्यावर जात असताना ही घटना घडली. वेळीच बिघाड लक्षात आल्याने अनर्थ टळला.