- सिद्धेश म्हात्रे

नवी मुंबई : राज्यातील बहुतांश जिल्ह्यात भोंग्यावर (loudspeaker) नमाज पठन झाले नसताना देखील मनसे कार्यकर्ते आंदोलन करत असल्याने एमआयएमने आक्रमक पवित्रा घेतला आहे. हिम्मत असल्यास मनसे (mns) कार्यकर्त्यांनी मशिदीजवळ येऊन हनुमान चालिसा पठन करावे असा इशारा एमआयएम नेते हाजी शाहनवाज खान (Haji Shahnawaz Khan) यांनी दिला आहे. (Hanuman chalisa row news in Marathi)

हाजी शाहनवाज खान म्हणाले मनसे कार्यकर्ते स्टंटबाजी करीत आहेत. आज अनेक ठिकाणी भाेंगे न लावता नमाज पठन झाले आहे. तरी देखील मनसे कार्यकर्ते आंदोलन करीत आहेत. आता आम्ही गप्प बसणार नाही.

त्यांच्यात (मनसे कार्यकर्ते) हिम्मत असल्यास त्यांनी मशिदीजवळ येऊन हनुमान चालिसा पठन करावे. मनसेने स्टंटबाजी केली तर एमआयएम कार्यकर्ते देखील शांत बसणार नाहीत हे लक्षात ठेवावे असा इशारा हाजी शाहनवाज खान यांनी दिला.

दरम्यान पाेलीसांनी नवी मुंबईत मनसे कार्यकर्त्यांची धरपकड सुरूच ठेवली आहे. वाशी येथील मनसे कार्यकर्त्यांना वाशी पोलिसांनी ताब्यात घेतले आहे. घरातून व कार्यालयातून मनसे पदाधिकाऱ्यांना देखील ताब्यात घेण्यात आले आहे. कायदा सुव्यवस्था बिघडू नये म्हणून खबरदारी घेतली जात आहे असे पाेलीसांनी स्पष्ट केले.

Edited By : Siddharth Latkar