स्वातंत्र्यदिनीच हा आंदोलनाचा भडका उडालाय कल्याण डोंबिवली महापालिकेच्या विरोधात.... कारण महापालिकेन स्वातंत्र्यदिनाचा चिकन, मटण दुकान बंदीचा रद्द केला नाही. त्याविरोधात खाटिक समाजान आक्रमक आंदोलन करत महापालिका भवनासमोर कोंबड्या फेकत पालिकेच्या निर्णयाचा निषेध केलाय...

राज्यातील कल्याण डोंबवली, इचलकरंजी, मालेगाव, संभाजीनगर, नागपूर या महापालिकांनी स्वातंत्र्यदिनी मांस विक्री बंद ठेवण्याचे आदेश जारी केले होते.. मात्र जनतेच्या रेट्यापुढे इचलकरंजी महापालिकेने मांस विक्री बंदीचा निर्णय मागे घेतला.. दुसरीकडे मटण प्रेमींच्या विरोधानंतरही कल्याण डोंबिवली महापालिकेने मात्र आडमुठेपणा करत आपला निर्णय कायम ठेवला.. त्यावरुन नागरिकांनी संताप व्यक्त केलाय...

महापालिकांच्या या तुघलकी निर्णयाविरोधात राजकीय वातावरणही चांगलंच तापलंय..जितेंद्र आव्हाडांनी कल्याणमध्ये मटण पार्टीला हजेरी लावत देश हुकूमशाहीच्या दिशेने जात असल्याची टीका केलीय.. मांसविक्री बंदी विरोध प्रकरण फक्त कल्याण डोंबिवली पुरतं मर्यादित राहिलं नाहीय... तर छत्रपती संभाजीनगर महापालिकेच्या मांस विक्री बंदीच्या आदेशाविरोधात एमआयएमचे प्रदेशाध्यक्ष इम्तियाज जलील यांनीही बिर्याणी पार्टीचं आयोजन केलं..

खरंतर भारतीय राज्यघटनेनं कलम 21 नुसार व्यक्तिगत स्वातंत्र्याचा मुलभूत अधिकार दिलाय.. ज्यामध्ये खाण्यापिण्याच्या स्वातंत्र्याचा समावेश आहे.. मात्र स्वातंत्र्य दिनासाठी काढलेलं पालिकांचं फर्मान नागरिकांच्या मुलभूत अधिकारावरच घाला घालणारं आहे.. एकीकडे लोकांनी काय खावं यात सरकारला कुठलाच रस नसल्याचं मुख्यमंत्र्यांनी सांगितलंय.. मात्र त्यानंतरही पालिका असं फर्मान काढत असतील तर त्यामागे नेमकं कारण काय ? आणि मांसबंदीचा हा निर्णय यावेळीच का ? असा प्रश्न निर्माण होतोय...