दिलीप कांबळे, मावळ

मावळ तालुक्यातील वडगाव येथे कोट्यवधी रुपये खर्च करून सुसज्ज असे तलाठी कार्यालय उभारण्यात आले आहे. मात्र दुर्दैवाने हे कार्यालय पूर्णपणे रिकामे असून नागरिकांना मूलभूत महसूल सेवांसाठी दारोदारी हेलपाटे मारावे लागत आहेत. विशेष म्हणजे तलाठी कार्यालय बंद असतानाही तलाठ्यांचा खाजगी दरबार मात्र वडगावच्या माळीनगर भागात दररोज भरत असल्याचा गंभीर प्रकार माहिती अधिकार कार्यकर्ते दत्ता काजळे यांनी उघडकीस आणला आहे.

राज्य शासनाचा स्पष्ट आदेश आहे की तलाठी, शिक्षक अथवा कोणताही सरकारी कर्मचारी ज्या गावात नेमणूक आहे, त्या गावातच वास्तव्यास असणे बंधनकारक आहे. मात्र या आदेशाला केराची टोपली दाखवत तलाठी अधिकारी एकाच ठिकाणी बसून काम करत असल्याचे वास्तव समोर आले आहे. परिणामी, शेतकऱ्यांना, सामान्य नागरिकांना दाखले, जमिनीचे फेरफार, सातबारा, उत्पन्न प्रमाणपत्र यांसारख्या महत्त्वाच्या कामांसाठी प्रचंड अडचणींचा सामना करावा लागत आहे.

तलाठी कार्यालय उघडे नसल्याने नागरिकांना वारंवार खाजगी ठिकाणी जावे लागत असून यात वेळ, पैसा आणि मानसिक त्रास सहन करावा लागत आहे. सरकारी जागेऐवजी खाजगी ठिकाणी दरबार भरवणे म्हणजे भ्रष्टाचाराला थेट खतपाणी घालण्यासारखे प्रकार असल्याचे बोलले जात आहे.

मावळ तालुक्यातील नागरिकांनी या प्रकरणाबाबत तीव्र नाराजी व्यक्त केली असून दोषी अधिकाऱ्यांवर तात्काळ शिस्तभंगाची कारवाई करण्यात यावी, अशी मागणी जोर धरू लागली आहे.. कोट्यवधींच्या सरकारी इमारती धूळ खात असताना अधिकारी मात्र खाजगी ठिकाणी ‘सत्ता चालवत’ असल्याचे चित्र मावळमध्ये सध्या बघायला मिळत आहे.