मावळ : मावळच्या देहुरोड परिसरात रात्रीच्या सुमारास भयानक घटना घडली आहे. मित्राचा फोन आल्याने भेटण्यासाठी गेला. मात्र या ठिकाणी गेल्यावर झालेल्या वादातून शास्त्राने सपासप वार करत हत्या केल्याची घटना उघडकीस आली आहे. तर शोध घेण्यासाठी गेलेल्या चुलत भावावर देखील वार करत जखमी केले आहे. सकाळच्या सुमारास उघडकीस आलेल्या या घटनेने परिसरात खळबळ उडाली आहे. 

मावळच्या देहूरोड येथील थॉमस कॉलनी येथे राहणारा दिलीप शुगर मोर्या (वय १७) असे घटनेत मृत झालेल्या युवकाचे नाव आहे. तर या घटनेत त्याचा पंधरा वर्षीय चुलत भाऊ जखमी झाला आहे. दरम्यान मयत दिलीप हा दहावीची परीक्षा उत्तीर्ण झाला असून वडिलांना बेकरी व्यवसायास मदत करीत होता. बुधवारी रात्री दहा वाजेच्या सुमारास त्यास त्याच्या ओळखीच्या व्यक्तीने फोन करून शितळानगर येथील गार्डनजवळ बोलविले. त्यानंतर त्याला शितळा नगर येथून साईनगर येथे जाणाऱ्या मोकळ्या मैदानात नेले. 

चुलत भावालाही केले जखमी 

दरम्यान दिलीप तसेच मारेकरी यांच्यात वाद झाल्याने मारेकऱ्याने त्याच्या जवळ असलेल्या धारधार चाकुने दिलीपच्या गळ्यावर, डोक्यात व इतर ठिकाणी वार केले. याच वेळी चूलत भावाला शोधण्यासाठी आलेल्या मृत दिलीपचा चुलत भाऊ घटनास्थळा वर पोहचला. घडलेला प्रकार त्याने पाहिला असता हल्लेखोराने त्याच्याही पोटात चाकूने हल्ला केला. मात्र आपला जीव वाचवत जखमी अरुण मोर्या हा तेथून पळून गेला. त्याने घडला प्रकार आपल्या मित्र, नातेवाईक व पोलिसांना सांगितलं. तर देहुरोड पोलीसांचे एक पथक रात्रभर बैपत्ता दिलीप याचा शोध घेत होते. 

पहाटे चार वाजता आढळला मृतदेह 

दरम्यान पहाटे चार वाजताच्या सुमारास दिलीप याचा मृतदेह शितळा नगर कडून साईनगर कडे जाणऱ्या कच्या रस्तावर अढळून आला. घटना स्थळावरून पोलीसांनी एक मोबाईल, चाकू हस्तगत केला आहे. आरोपीच्या शोधासाठी पोलीसांनी एक पथक रवाना केले आहे. तर मयत याचा मृतदेह शव विच्छेदनासाठी पिंपरी येथील वायसीएम रुग्णालयात पाठविण्यात आला आहे. अधिक तपास देहूरोड पोलीस करीत आहे.