नेरळ-माथेरान या नॅरोगेज मार्गावर चालणारी मिनिट्रेन पावसाळी चार महिने बंद रहाणार आहे. 1 जून ते 15 ऑक्टोबर पर्यंत ही सेवा बंद राहणार असून अमन लॉज ते माथेरान शटल सेवा सुरळीत आपल्या नियोजित वेळेनुसार धावणार आहे. दरम्यान प्रत्येक शनिवारी रिकाम्या बोगी घेऊन नेरळ हुन मिनिट्रेन सुटेल व माथेरानमध्ये आल्यानंतर शटल सेवेमध्ये रूपांतर केले जाणार आहे. तसेच मालवाहू मिनिट्रेन दररोज चालविली जाणार आहे.

मे महिन्याच्या शेवटच्या आठवड्यात झालेल्या जोरदार पावसामुळे अमन लॉज ते वॉटर पाईप स्थानकादरम्यान दरड कोसळण्याचे प्रकार घडले असल्याने सुरक्षेच्या कारणास्तव मिनिट्रेन 1 जून पासून विश्रांती घेणार आहे. तर 15 ऑक्टोबरला रेल्वे रुळाचा आढावा घेऊन सुरक्षित असल्याची खात्री झाल्यानंतर प्रवाश्यांच्या सेवेसाठी धावणार आहे. अशी माहिती परिपत्रकाद्वारे मध्य रेल्वेने दिली आहे.

या 21 किलोमीटर अंतरामध्ये दरड प्रवण क्षेत्र असल्याने तसेच भूस्खलनाचे प्रकार झाले असल्याने पर्यटक, प्रवाश्यांच्या सुरक्षेला प्राधान्य देऊन दरवर्षी प्रमाणे यावर्षी देखील चार महिने विश्रांती घेणार आहे अशी माहिती परिपत्रकाद्वारे मध्य रेल्वेच्या परिचालन विभागाने दिली आहे. त्या पत्रकात पुढे असेही नमूद केले आहे की, 7 जून पासून प्रत्येक शनिवारी रिकामी बोगी घेऊन सकाळी 8:50 वाजता मिनिट्रेन नेरळ हुन सुटेल व माथेरानमध्ये आल्यानंतर शटल सेवेत रूपांतरित होऊन राहिलेल्या बोगी घेऊन त्याच दिवशी दुपारी 2:45 मिनिटांनी माथेरानहून सुटेल.

तसेच दररोज सकाळी (शनिवार व रविवार वगळता) 8:20 वाजता मालवाहू गाडी नेरळहुन सुटेल व सूर्यास्त होण्याच्या आत नेरळस्थानकात येईल.नेरळ-माथेरान ही मिनिट्रेन बंद झाली असली तरी शटल सेवा ही प्रवाशी व पर्यटक याना नियमित दिली जाणार आहे. मिनिट्रेन हे माथेरान या पर्यटनस्थळाचे मुख्य आकर्षण असल्याने पर्यटक या मिनिट्रेनमध्ये बसून निसर्गाच्या सानिध्यात मजा करायला येतात. पर्यटकांचा हिरमोड होऊ नये यासाठी अमन लॉज-माथेरान शटल सेवा दररोज सुरू राहणार आहे.