Nashik : सप्तश्रृंगी गड घाटात भाविकांच्या गाडीवर कोसळली दरड; मोठी दुर्घटना टळली

अजय सोनवणे 
नाशिक : नाशिक जिल्ह्यात मागील दहा- बारा दिवसांपासून सतत पाऊस होत आहे. यामुळे डोंगर दऱ्यांचा भाग कोसळत असल्याचे पाहण्यास मिळत आहे. याच दरम्यान नाशिकच्या सप्तश्रुंगी गडावर जाणाऱ्या भाविक घाट रस्त्यातून जात असताना त्यांच्या गाडीवर अचानक दरडीचा काही भाग कोसळला आहे. यामध्ये कारचे मोठे नुकसान झाले असून सुदैवाने मोठी दुर्घटना टळली असून कारमधील भाविक सुखरूप आहेत. 

सुट्यांचा कालावधी असल्याने अनेकजण फिरणे आणि देवदर्शनासाठी जात आहे. त्यानुसार नाशिक जिल्ह्यातील सप्तशृंगी देवीच्या दर्शनासाठी भाविक मोठ्या संख्येने जात आहेत. दरम्यान मागील काही दिवसांपासून नाशिक जिल्ह्यात अवकाळी पाऊस सुरु आहे. जोरदार होत असलेल्या या पावसामुळे डोंगर भागातील दगड कोसळत आहेत. यातूनच वणीच्या गडाच्या घाट रस्त्यात दरड कोसळल्याची घटना घडली आहे. 

कार दगड कोसळल्याने मोठे नुकसान 

सप्तशृंगी देवीच्या गड चढण्यासाठी मोठा घाट रस्ता आहे. या घाटात काल दुपारच्या सुमारास जोरदार पाऊस झाल्यामुळे किरकोळ स्वरूपात दरड कोसळल्याची घटना घडली. या दरडीतून दगडगोटे पुण्याहून आलेल्या भाविकांच्या कारवर पडले. त्यामुळे गाडीच्या काचा, साइड मिरर तसेच अन्य भागांचे मोठे नुकसान झाले. मात्र सुदैवाने गाडीत असलेल्या भाविकांना कोणतीही दुखापत झाली नाही. 

प्रशासनाने वाहतुकीसाठी रस्ता केला मोकळा 
दरम्यान घटनेची माहिती मिळताच नांदुरी पोलीस स्टेशनचे अधिकारी तसेच पोलीस मित्र आणि आपत्ती व्यवस्थापन पथक घटनास्थळी दाखल झाले. त्यांनी तातडीने दगड हटवून रस्ता वाहतुकीसाठी मोकळा केला. दरड कोसळण्याच्या घटनांना आळा घालण्यासाठी घाटात मोठ्या जाळ्यांची बसवणूक करण्यात आली आहे. मात्र, या जाळ्यांचा आकार मोठा असूनही अशा घटना घडत असल्याने संबंधित विभागाने तात्काळ ठोस उपाययोजना करावी; अशी मागणी वाहनचालकांकडून करण्यात येत आहे.