रुपेश पाटील, पालघर

पालघर मध्ये शेकडो कोटींच्या जमिनीचा घोटाळा समोर आला आहे . पालघरच्या तलासरी येथील काजळी सहकारी सामुदायिक शेती संस्था मर्यादित संस्थेची मुंबई अहमदाबाद राष्ट्रीय महामार्ग लगत असलेली 55 एकर जमीन संस्था संचालकांसह तत्कालीन सहाय्यक निबंधक असलेल्या अधिकाऱ्याने कवडीमोल दराने विक्री केल्याचा धक्कादायक प्रकार समोर आला आहे.

2022 साली या 55 एकर जमिनीची किंमत शासकीय किमती नुसार सात कोटी रुपये असताना देखील या संस्थाचालक आणि सहाय्यक निबंधकाने केवळ 70 लाखांना या जमिनीची विक्री केली . विशेष म्हणजे या जमिनीची किंमत 2022 साली साधारणतः सात कोटी असली तरी आता या जमिनीची किंमत ही शेकडो कोटींच्या घरात असल्याचा अंदाज वर्तवण्यात येतोय .

तलासरीच्या काजळी येथे शासनाकडून शेतकऱ्यांसाठी काजळी सामुदायिक शेती सहकारी संस्था निर्माण करण्यात आली होती . या संस्थेसाठी 55 एकर जमीन देण्यात आली असून 2022 साली या जमिनीची संस्था संचालक आणि या संस्थेवर नियंत्रण असलेल्या सहाय्यक निबंधका मार्फत केवळ 70 लाखांना विक्री करण्यात आली आहे.

विशेष म्हणजे खरेदी करणारे मालक या संस्था संचालकांमधूनच काहीजण असून हा धक्कादायक प्रकार समोर आल्यानंतर एका लेखापरीक्षकामार्फत या संस्थेच आणि जमिनीच ऑडिट करण्यात आलं . या ऑडिटमध्ये या व्यवहारात मोठ्या प्रमाणावर गैरव्यवहार झाल्याच निष्पन्न झाले. त्यानंतर सध्याचे सहाय्यक निबंधक तसेच ऑडिटर यांच्यामार्फत तत्कालीन संस्थाचालकांसह तत्कालीन सहाय्यक निबंधक अशा एकूण सहा जणांवर गुन्हा दाखल करण्यासाठी पालघर पोलिसांना पत्र देण्यात आल आहे . याबाबत लवकरच गुन्हा दाखल न झाल्यास मनसे स्टाईलने आंदोलन करू असा इशारा मनसेचे तालुका प्रमुख विजय वाडिया यांच्या कडून देण्यात आला आहे.