maratha Andolan News:

जालन्यात अंतरवाली सराटी गावात मराठा आरक्षणासाठी आंदोलक मनोज जरांगे हे गेल्या १३ दिवसांपासून उपोषणाला बसले आहेत. मनोज जरांगे यांच्या उपोषणामुळे मराठा आरक्षणाचा मुद्दा ऐरणीवर आला आहे. या पार्श्वभूमीवर मुख्यमंत्री एकनाथ शिंदे यांनी उद्या म्हणजे ११ सप्टेंबर रोजी मुंबईतील सह्याद्री अतिथीगृहात सर्वपक्षीय बैठक बोलावली. यानंतर मनोज जरांगे यांनी गोरगरिबांना मुलांना आरक्षण कसं मिळेल याचा विचार बैठकीत करावा, अशी विनंती मनोज जरांगे यांनी केली. (Latest Marathi News)

मनोज जरांगे पाटील यांनी प्रसारमाध्यमांशी संवाद साधला. मुख्यमंत्र्यांनी बोलावलेल्या बैठकीवर भाष्य करताना मनोज जरांगे पाटील म्हणाले, ‘मुंबईत उद्या सर्वपक्षीय मराठा आरक्षणावर बैठक असेल, तर त्यांना वाकून कळकळीची विनंती आहे की, त्यांनी कुठलीही आड काठी न घालता गोरगरिबांच्या मुलांना आरक्षण कसं मिळेल याचा विचार करावा. त्या मुलांचं घर, त्या मुलांचं गाव, त्यांच्या अंगावर फाटलेले कपडे याचा विचार करावा’.

‘गोरगरीब मुलांच्या बापाचं स्वप्न असतं की, आपला मुलगा कुठं तरी नोकरीला लागेल. तुम्ही त्याच्या स्वप्नाचा विचार करा. त्याचे मायबाप बना, पालक बना, त्याच्या विचार करा. तु्म्ही आर्शीवादरुपी आरक्षणावर तोडगा काढा. आमच्या वेदना, आमचा आक्रोश घेऊन बैठकीला जा. उद्या होणारी बैठक यशस्वी करा. मी तुमचा नतमस्तक होईल, असे ते म्हणाले.

‘मी एक पाऊल मागे सरकत त्यांचा सन्मान केला. त्यांच्या ज्या त्रुटी आहेत, त्या पूर्ण करतो असं आश्वासन त्यांनी दिलं आहे. आम्ही त्यांच्या निर्णयाची वाट बघत आहे. आमचं मत असं आहे की, २००४ सालचा शासन निर्णय लागू करा. त्यात आम्ही समाधानी आहे. मुख्यमंत्री एकनाथ शिंदेंवर आमचा पूर्ण विश्वास आहे. ते आमची मागणी पूर्ण करतील, असेही जरांगे म्हणाले.