मालेगाव महापालिकेतील सत्ता मिळवण्यासाठी शिवसेनेने MIMचा पाठिंबा मागितलाय. त्यासाठी खु्द्द मंत्री दादाजी भुसे यांनी इम्तियाज जलील यांना फोन केल्याचा दावा एमआयएमचे नेते इम्तियाज जलील यांनी केला आहे. मालेगाव महापालिका निवडणुकीत इस्लाम पक्षानं धमाकेदार विजय मिळवत अनेकांना थक्क केलं.

अवघ्या दीड वर्षापूर्वी माजी आमदार आसिफ शेख यांनी स्थापन केलेल्या या पक्षाने पहिल्याच प्रयत्नात कमाल केली. इस्लामी पार्टीनं सर्वाधिक ३५ जागा जिंकत बाजी मारली. इस्लामी पार्टीनं महापालिकेत समाजवादी पक्षाशी युती केली होती. पण समजावादी पक्षाला मात्र ५ जागा जिंकता आल्या. मात्र एमआयएमच्या दाव्यामुळे राजकारणात मोठी खळबळ उडाली आहे. एका खासगी वृत्तवाहिनीशी बोलताना त्यांनी हा खुलासा केलाय.

दरम्यान शिवसेनेने पाठिंबा मागितला असला तरी आम्ही शिवसेना आणि भाजपला पाठिंबा देणार नाही असंही जलील यांनी स्पष्ट केलं. भाजप व एकनाथ शिंदे यांची शिवसेना सोडून इतर कुणालाही सकारात्मक पाठिंबा देऊ, असे इम्तियाज जलील म्हणालेत. भाजप शिवसेनेला बाहेर ठेऊन इतर पक्ष एकत्र येत असतील आणि सन्मानाने आम्हाला विचारणा करत असतील तर आम्ही त्यांच्यासोबत जाऊ असेही जलील म्हणाले.

कॉंग्रेसने तसेच शिवसेना शिंदे गटानेदेखील एका ठिकाणी आमचे समर्थन मागितले आहे, असा दावा त्यांनी केला. मात्र आम्ही स्पष्ट शब्दात नकार दिला. तर जलील यांनी केलेल्या दाव्यावर मंत्री दादा भुसे काय खुलासा करतात हेही पाहावे लागणार आहे. कोणत्याही परिस्थितीत मालेगाव सारख्या ठिकाणी आम्ही एकनाथ शिंदे यांच्यासोबत जाणार नाही असं जलील म्हणालेत.

दुसरीकडे कोल्हापुरमध्ये काँग्रेस- शिवसेना शिंदे गट एकत्र येणार असल्याची चर्चा आहे. येथे शिवसेना शिंदे गट किंगमेकरच्या भूमिकेत आहे. अशा स्थितीत शिवसेनेला आपल्याकडे खेचण्याचा प्रयत्न काँग्रेसचा आहे. काँग्रेस नेते सतेज पाटील तसे प्रयत्न देखील करत असल्याची चर्चा राजकीय वर्तुळात रंगली आहे. महापौर पदाबाबत आमदार सतेज पाटील यांना कोल्हापुरात काँग्रेस आणि शिवसेनेची युती होणार का असा प्रश्न विचारण्यात आला. त्यावेळी त्यांनी बॅकडोअर चर्चा असल्याचं म्हटलं.