महाराष्ट्राच्या राजकारणात खळबळ उडून देणारी बातमी हिंगोलीमधून पुढे आली आहे. एकनाथ शिंदे यांच्या शिवसेनेकडून देण्यात आलेले एबी फॉर्म चक्क राष्ट्रवादीच्या आमदाराने उमेदवारांना वाटप केल्याचा गंभीर प्रकार हिंगोलीच्या वसमत नगरपरिषदेच्या निवडणुकीत घडला आहे. राज्याचे माजी सहकार कॅबिनेट मंत्री जयप्रकाश मुंदडा यांनी हा धक्कादायक आरोप केला आहे.

शिवसेना आमदार संतोष बांगर यांनी वसमत विधानसभेचे राष्ट्रवादी काँग्रेसचे आमदार चंद्रकांत नवघरे यांच्याकडे शिवसेनेचे एबी फॉर्म दिल्याचं मुंदडा म्हणाले आहेत. एबी फॉर्म मिळाले नसल्याने शिवसेनेच्या नगराध्यक्षपदाच्या उमेदवार सविता मारुती क्यातमवार यांच्यासह नगरसेवक पदासाठी निवडणुकीच्या मैदानात उभ्या असलेल्या वीस उमेदवारांना अपक्ष उमेदवारी अर्ज दाखल करावा लागला आहे.

या सगळ्या प्रकारानंतर माजी मंत्री जयप्रकाश मुंदडा यांनी उपमुख्यमंत्री एकनाथ शिंदे यांची भेट घेत ही सगळी माहिती दिलेली आहे ,उपमुख्यमंत्री एकनाथ शिंदे यांनी आता वसमत पालिकेत अपक्ष म्हणून उभ्या असलेल्या या उमेदवारांना शिवसेना पुरस्कृत म्हणून घोषित करा, असे आदेश दिल्याचे देखील जयप्रकाश मुंदडा म्हणाले आहेत. तर भाजपचे नेते शिवदास बोडेवार यांनी देखील राष्ट्रवादीच्या आमदाराकडे शिवसेनेचे एबी फॉर्म असल्याचे सांगितले आहे

या सगळ्या प्रकारानंतर आमदार चंद्रकांत नवघरे आणि शिवसेना आमदार संतोष बांगर यांनी मात्र अद्याप प्रतिक्रिया दिली नसल्याने ते या प्रकरणात काय भूमिका मांडतात याकडे सगळ्यांचे लक्ष लागले आहे.