पराग ढोबळे, साम टीव्ही

नागपूर : वाशिम जिल्ह्यातील रिसोड तालुक्यात काँग्रेसला मोठा धक्का बसला असून सुमारे 600 कार्यकर्त्यांनी भारतीय जनता पक्षात पक्षप्रवेश केला. महसूल मंत्री तथा नागपूर आणि अमरावती जिल्ह्याचे पालकमंत्री चंद्रशेखर बावनकुळे यांच्या उपस्थितीत हा पक्षप्रवेश सोहळा नागपूर येथे पार पडला. रिसोड येथील युवक काँग्रेसचे महाराष्ट्र प्रदेश सचिव सचिन इप्पर यांनीही भाजपमध्ये प्रवेश करत काँग्रेसला धक्का दिला. त्यांच्या सोबत रिसोड तालुक्यातील अनेक सरपंच, माजी सरपंच, सोसायटीचे अध्यक्ष, सदस्य तसेच ग्रामपंचायत सदस्यांनीही भाजपचा झेंडा हाती घेतला.

या पक्षप्रवेशामुळे वाशिम जिल्ह्यात भाजपची संघटनात्मक ताकद वाढल्याचा दावा पक्षाकडून करण्यात आला आहे. पक्षात प्रवेश करणाऱ्या कार्यकर्त्यांनी पंतप्रधान नरेंद्र मोदी आणि मुख्यमंत्री देवेंद्र फडणवीस यांच्या नेतृत्वावर विश्वास व्यक्त करत भाजपमध्ये प्रवेश केल्याचे सांगितले. यावेळी चंद्रशेखर बावनकुळे यांनी पक्षात प्रवेश करणाऱ्या सर्वांचे स्वागत करत भाजप संघटन अधिक बळकट करण्यासाठी सर्वांनी एकत्रितपणे काम करण्याचे आवाहन केले. तसेच भाजपच्या विकासाभिमुख धोरणांवर विश्वास ठेवून हा पक्षप्रवेश झाल्याचेही उपस्थितांनी नमूद केले.

उद्धव ठाकरेंना पुण्यात मोठा धक्का

शिवसेना उद्धव बाळासाहेब ठाकरे पक्षाकडून शिवाजीनगर मतदार संघातून विभाग प्रमुख राहिलेले आणि नुकतीच पुणे महानगरपालिका काँग्रेस पक्षाकडून लढवलेले प्रवीण डोंगरे यांनी रवींद्र चव्हाण यांच्या हस्ते भाजपमध्ये प्रवेश केला. शिवाजीनगर विधानसभा मतदारसंघातील सामाजिक आणि सार्वजनिक क्षेत्रात तसेच रस्त्यावरच्या लढाईमध्ये तसंच अनेक आंदोलनात ते शिवसेनेकडून सक्रिय पदाधिकारी म्हणून कार्यरत होते.

पक्षप्रवेशानंतर बोलताना प्रविण डोंगरे म्हणाले, "देशाचे पंतप्रधान नरेंद्र मोदी यांच्या नेतृत्वाखाली देश विकासाच्या नव्या दिशेने वाटचाल करत आहे. राज्यातील नेतृत्व मुरलीधर मोहोळ आणि आमदार सिद्धार्थ शिरोळे यांच्या विकासाभिमुख कामांमुळे प्रेरित होऊन मी भारतीय जनता पक्षात प्रवेश करत आहे असे प्रवीण डोंगरे म्हणाले.