आगामी स्थानिक स्वराज्य संस्थाच्या निवडणुकीच्या तोंडावर उद्धव ठाकरेंना मोठा धक्का बसला आहे. बीडमधील गेवराईचे माजी आमदार बदामराव पंडित लवकरच भाजपमध्ये प्रवेश करणार असल्याची माहिती सूत्रांनी दिली आहे. तसेच माजी आमदार लक्ष्मण पवार यांचे बंधू बाळराजे देखील पवार देखील भाजपशी जवळीक करणार आहेत. या नेत्यांची भाजपशी जवळीक वाढणार असल्याने उद्धव ठाकरेंच्या पक्षाला गेवराईत मोठा हादरा बसणार आहे.

'सकाळ'च्या वृत्तानुसार, बीडच्या गेवराईमधील राजकारणात पवार आणि दोन पंडित यांचं नाव आघाडीवर आहे. शिवाजीराव पंडित आणि बदामराव पंडित यांनी तीन वेळेस आमदारकी मिळाली आहे. लक्ष्मण पवार यांना दोन वेळा आमदारकी मिळाली आहे.

अमरसिंह पंडित, दिवंगत माधवराव पवार, शाहुराव पवार यांना प्रत्येकी एकदा आमदारकी मिळाली आहे. आता गेवराईत विजयसिंह पंडित हे आमदार आहेत. मागील विधानसभा निवडणुकीत ठाकरे गटाचे बदामराव पंडित यांचा त्यांचे पुतणे विजयसिंह पंडित यांनी ४० हजार मतांनी पराभव केला.

बदामराव पंडित यांची भाजपशी जवळीक वाढली आहे. स्थानिक स्वराज्य संस्थाच्या निवडणुकीच्या तोंडावर बदामराव पंडित हे मशाल सोडून कमळ हाती घेणार असल्याचं वृत्त सोशल मीडियावर व्हायरल होत आहे. बदामराव पंडित आणि माजी आमदार लक्ष्मण पवार यांचे बंधू बाळराजे पवार देखील भाजपमध्ये प्रवेश करणार असल्याची माहिती मिळत आहे.

स्थानिक स्वराज्य संस्थेच्या निवडणुकीत बदामराव पंडित यांच्या पक्षप्रवेशाने ठाकरे गटाला गेवराईत मोठा हादरा बसणार आहे. तर बदामराव पंडित आणि बाळराजे पवार यांचा पक्षप्रवेश मुख्यमंत्री देवेंद्र फडणवीस यांच्या उपस्थितीत होईल. दोन्ही नेत्यांच्या पक्षप्रवेशामुळे राष्ट्रवादीचे आमदार विजयसिंह पंडित आणि माजी आमदार अमरसिंह पंडित यांना येणार्‍या आगामी निवडणुकीत मोठं आव्हान असणार आहे.