परभणी जिल्ह्याच्या आरोग्य विभागात मोठी खळबळ उडालीये. जिल्हा शल्यचिकित्सक डॉ. नागेश लखमवार आणि जिल्हा परिषदेचे जिल्हा आरोग्य अधिकारी डॉ. संजय पांचाळ यांना एकाच दिवशी निलंबित करण्यात आलंय. कामात झालेल्या चुकीच्या कारणावरून दोन्ही अधिकाऱ्यांची विभागीय चौकशी केली जाणार आहे. आरोग्य विभागाचे उपसचिव दीपक केंद्रे यांनी याबाबतचे आदेश काढलंय.

गर्भवती महिलेचा आणि बाळाचा मृत्यू

जिंतूरमध्ये सात महिन्यांची गर्भवती महिला उपचारांसाठी जिल्हा रुग्णालयात दाखल झाली होती. मात्र तिला पुरेसे उपचार मिळाले नसल्याने महिलेचा आणि तिच्या गर्भातील बाळाचा मृत्यू झाला. ही घटना अत्यंत गंभीर असल्याचं नमूद करण्यात आलंय.

या प्रकरणात जिल्हा शल्यचिकित्सक डॉ. नागेश लखमवार यांनी देखरेख आणि प्रशासकीय जबाबदारी योग्य पद्धतीने पार पाडली नसल्याचा ठपका ठेवण्यात आला आहे. त्यामुळे त्यांचं निलंबन करून विभागीय चौकशीचे आदेश देण्यात आलेत. निलंबनाच्या काळात त्यांचं मुख्यालय लातूरमधील मंडळ अधिकारी कार्यालय राहणार आहे.

दरम्यान, जिल्हा आरोग्य अधिकारी डॉ. संजय पांचाळ हे दैनंदिन कामकाजाकडे अक्षम्य दुर्लक्ष करत असल्याचा अहवाल जिल्हा परिषदेच्या मुख्य कार्यकारी अधिकाऱ्यांनी आरोग्य विभागाला पाठवला होता. या अहवालाच्या आधारे त्यांच्यावरही निलंबनाची कारवाई करण्यात आली आहे. निलंबन काळात त्यांचं मुख्यालय धाराशिव राहणार आहे.

जिल्ह्याच्या आरोग्य विभागाचा कारभार पाहणारे दोन्ही प्रमुख अधिकारी एकाच दिवशी निलंबित झाल्याने आरोग्य विभागात मोठी चर्चा सुरू झाली आहे.