राज्यात होणाऱ्या विधानपरिषदेच्या निवडणूकीनं राज्याच्या राजकारणाला असे हादरे आणि धक्के दिले की, ज्याने निवडणूक पद्धतीवरचा विश्वासच उडावा असंच चित्र निर्माण झालंय. याचा सर्वात धक्कादायक चित्र कोकणात पाहायला मिळालं. कालपर्यंत जोषात निवडणूक लढवणारे ठाकरे गटाचे उमेदवार बाळ माने यांनी अर्ज मागे घेण्याच्या अखेरच्या दिवशी थेट नितेश राणेंसोबत जात निवडणूक न लढवण्याचा निर्णय जाहीर केला. बाळ मानेंनी आपला निर्णय जाहीर करताच मुंबईतल्या मातोश्रीला देखिल धक्का बसला. महायुतीनं जागा राष्ट्रवादीला सोडली होती. मात्र ठाकरेंच्या उमेदवारानं माघार घ्यावी यासाठी ठाकरेंचे कट्टर विरोधक मंत्री नितेश राणेच मैदाना उतरले. मात्र उदय सांमतांच्या एका वक्तव्यानं माघार घेतलेल्या बाळ मानेंच्या दाव्याचीही हवा निघालीये.

कधीकाळी शिवसेनेचा गड असलेल्या कोकणात सध्या ठाकरेंकडे एकमेव आमदार आणि एकही खासदार नाही आणि नगरसेवकांची संख्याही हाताच्या बोटावर मोजण्याइतकीच. त्यात विधान परिषदेच्या निवडणुकीत थेट उमेदवारच फोडून ठाकरेंना मोठा सेटबॅक देण्यात महायुतीला यश आलंय. परंतू फक्त कोकणातच नाही तर राज्यभरात महाविकास आघाडीनं अक्षरशा शरणागती पत्करल्याचं चित्र आहे. काही ठिकाणी उमेदवारच दिला नाही तर अनेक ठिकाणी ऐनवेळी माघार घेतली. कुठेकुठे मविआनं शरणागती पत्करली ते पाहूया.

विधान परिषदेत मविआची शरणागती

रत्नागिरी-सिंधुदुर्ग-रायगड

ठाकरेसेनेच्या बाळा मानेंची अचानक माघार

ठाणे

राष्ट्रवादी(SP)चे उमेदवार अभिजीत पवारांची माघार

पुणे

राष्ट्रवादी(SP)च्या श्रीकांत पाटलांची माघार

यवतमाळ

काँग्रेसचे उमेदवार साहेबराव कांबळेंची माघार

वर्धा-गडचिरोली-चंद्रपूर

काँग्रेसच्या शैलेश अग्रवालांची माघार

अहिल्यानगर

2 इच्छुक उमेदवार असूनही काँग्रेसनं AB फॉर्म दिला नाही

छत्रपती संभाजीनगर

ठाकरेसेनेच्या देवयानी डोणगावकर यांची अखेरच्या क्षणी माघार

विधानपरिषदेच्या या नाट्यमय राजकीय घडामोडींनंतर ठाकरे गटानं संताप व्यक्त करत निवडणूक व्यवस्थेवरच सवाल उपस्थित केलेत.

लोकशाहीत निवडणूक हा सर्वात मोठा उत्सव मानला जातो. कुठलीही निवडणूक ही पारदर्शक वातावरणात पार पडली की लोकशाहीचा जागर होतो. मात्र महापालिका निवडणूकांपासून उमेदवार फोडून बिनविरोध निवडणूका करण्याचा सुरु झालेला हा ट्रेन्ड लोकशाहीच्या सशक्तीकरणाच्या धोरणाला बट्टा लावतोय. महाराष्ट्रात सुरू झालेल्या य़ा माघारीच्या पॅटर्नमुळे लोकशाहीसोबतच तडजोड सुरू झाल्याची चर्चा रंगलीय.