महावितरणने आपल्या ग्राहकांसाठी 'लकी डिजिटल ग्राहक योजना' सुरू केली आहे. या योजनेच्या अंतर्गत, जर तुम्ही ऑनलाइन वीजबील भरले, तर तुम्हाला स्मार्टफोन, स्मार्टवॉच यासारखी आकर्षक बक्षिसे जिंकण्याची संधी मिळेल. ही योजना जानेवारी ते मे महिन्याच्या कालावधीत लागू आहे. त्यामुळे, वीज बिल भरण्याच्या पारंपारिक पद्धतीला सोडून, ऑनलाइन माध्यमांचा वापर करा आणि लकी कस्टमर योजना अंतर्गत बक्षिसे जिंकण्याची संधी मिळवा.

महावितरणने जाहीर केलेल्या 'लकी डिजीटल ग्राहक' योजना अंतर्गत लघुदाब गटातील ग्राहक ज्या ग्राहकांनी १ एप्रिल २०२३ ते ३१ मार्च २०२४ या कालावधीत एकदाही वीज बिल भरलेले नाही, ऑनलाईन वीज देयक भरलेले नाही किंवा ऑनलाईन वीज देयक भरण्याचा पर्याय वापरलेला नाही, अशा ग्राहकांना ही योजना लागू होईल. फक्त लघुदाब गटातील ग्राहक (ज्यांनी वरील कालावधीत ऑनलाईन वीज बिल भरलेले नाही). सार्वजनिक पाणीपुरवठा ग्राहक, पथदिवे ग्राहक, फ्रँचायझी क्षेत्रातील ग्राहक यांना यातून वगळण्यात आले आहे. महावितरणने जास्तीत जास्त पात्र ग्राहकांनी ऑनलाईन पद्धतीने वीज बिल भरून या योजनेचा लाभ घ्यावा असे आवाहन केले आहे.

स्मार्ट फोन, स्मार्ट वॉच बक्षीस

महावितरणच्या प्रत्येक उपविभाग स्तरावर एप्रिल, मे आणि जून २०२५ या महिन्यांमध्ये प्रत्येकी तीन ऑनलाईन सोडती काढण्यात येणार आहेत. प्रत्येक सोडतीत ५ विजेते निवडले जातील आणि त्यांना स्मार्टफोन व स्मार्टवॉच अशी आकर्षक बक्षीसे दिली जाणार आहेत.

वेळेसह पैशांची बचत

महावितरणकडून वीज ग्राहकांना डिजीटल पद्धतीने वीजबील भरण्यासाठी प्रोत्साहन दिले जात आहे. रांगेत उभे राहण्याच्या त्रासापेक्षा ग्राहकांना वेळ, श्रम आणि पैशांची बचत व्हावी, यासाठी महावितरणने ऑनलाईन सुविधा उपलब्ध करून दिली आहे. ग्राहक महावितरणच्या संकेतस्थळावर किंवा महावितरण मोबाईल अ‍ॅपच्या माध्यमातून वीजबील भरू शकतात. डिजीटल पद्धतीने वीजबील भरणाऱ्या ग्राहकांना बिलाच्या रकमेवर ०.२५ टक्के सूट मिळते. राज्यात सध्या ७०% हून अधिक ग्राहक ऑनलाईन वीजबील भरत आहेत, यामुळे वीजबील भरण्याची प्रक्रिया अधिक सुलभ आणि जलद झाली आहे.

Edited By - Purva Palande