पराग ढोबळे, ता. ९ मे २०२४

गेल्या काही दिवसांपासून राज्यभरात उन्हाचा कडाका पाहायला मिळत आहे. राज्यभरात उन्हाच्या वाढत्या झळांनी नागरिक हैराण झालेत. अशातच आज नागपुरमध्ये काळे ढग दाटून आले अन् सकाळी सकाळी जोरदार पाऊस झाला. नागपुरसह वर्धा, बुलढाणा, गोंदिया जिल्ह्यामध्येही अवकाळी पावसाच्या सरी बरसल्या.

भरदिवसा अंधार अन् मुसळधार पाऊस...

नागपुर शहरात सकाळी सकाळीच काळोख दाटून आला अन् सोसाट्याच्या वाऱ्यासह मुसळधार पाऊस पडला. हवामान विभागाकडून आज पूर्व आणि पश्चिम विदर्भात पावसाचा अंदाज वर्तवण्यात आला होता. या अंदाजानुसार सकाळ सकाळीच नागपुरकरांना पावसाने झोडपून काढले. भरदिवसा मोठ्या प्रमाणावर काळे ढग दाटून आले होते. त्यामुळे शहरात अंधार पसरला होता. यावेळी अंधारामुळे वाहनचालकांना दिवसा गाडीच्या लाईट्स लाऊन प्रवास करावा लागला.

वर्ध्यातही अवकाळीचा तडाका..

वर्धा जिल्ह्यामध्येही गेल्या काही दिवसांपासून उन्हाचा चटका वाढत होता. अशातच आज सकाळी अचानक वातावरणात बदल होत अवकाळी पावसाने हजेरी लावलीय. अचानक आलेल्या पावसामुळे नागरिकांची चांगलीच तारांबळ उडाली.पावसामुळे उकाड्याने त्रस्त झालेल्या नागरिकांना दिलासा मिळाला असून वातावरणात गारवा निर्माण झाला आहे. मात्र या पावसामुळे जिल्ह्यात उन्हाळी पीक घेणाऱ्या शेतकऱ्यांना फटका बसण्याची शक्यता आहे. काही शेतकऱ्यांनी तीळ आपल्या शेतात कापणी करून ठेवला आहे तर काही पिके कापणे सुरु आहे.

गोंदियात बरसल्या सरी, शेतकऱ्यांचे नुकसान..

नागपुर वर्ध्याप्रमाणे गोंदिया जिल्ह्यातही दमदार पावसाने हजरी लावली. मात्र या अवकाळी पावसामुळे शेतकऱ्यांना मोठा फटका बसला आहे. रब्बी हगामातील धान बांधावर कापून ठेवल्याने शेतात सर्वत्र पाणी साचून आहे. त्यामुळे अस्मानी संकटामुळे शेतकरी मेटाकुटीला आला आहे.

बुलढाण्यात अवकाळी पावसाची हजेरी..

बुलढाणा जिल्ह्यातील मेहेकर साखरखेर्डा परिसरात दमदार अवकाळी वादळी वाऱ्यासह पावसाने हजेरी लावली. या पावसाने मका, ज्वारी, उन्हाळी भुईमुंग व भाजीपाला या पिकांचे मोठे नुकसान झाले आहे. तसेच साखरखेर्डा परिसरातसुद्धा अवकाळी पावसाने दमदार हजेरी लावली यावेळी विद्युत पुरवठा खंडित झाला यामुळे पाणी पुरवठावर परिणाम झाला आहे.