Maharashtra Political News : राष्ट्रवादी शरद पवार गटाचे आमदार रोहित पवार यांनी राज्याचे कृषीमंत्री माणिकराव कोकाटे यांचा विधिमंडळातला व्हिडीओ एक्सवर पोस्ट केला होता. शेतकरी संकटात असताना कृषीमंत्री रमी खेळत असल्याचे रोहित पवार यांनी म्हटले होते. या प्रकरणाची राजकीय वर्तुळात मोठी चर्चा झाली. रमी प्रकरणामुळे माणिकराव कोकाटे यांचे मंत्रीपद जाऊ शकते अशी शक्यता व्यक्त केली जात आहे.

विधिमंडळाच्या सभागृहामधील व्हिडीओ व्हायरल झाल्यानंतर माणिकराव कोकाटे यांच्यावर सर्वबाजूंनी टीका झाली. या रमी खेळण्यावरुन विरोधकांनी कोकाटेंना धारेवर धरले. त्यानंतर 'मी रमी खेळत नव्हतो. मी मोबाईलवर युट्यूब सुरु केले होते. तेव्हा व्हिडीओच्याआधी रमीची जाहिरात आली होती. ती जाहिरात मी स्कीप करत होतो. जाहिरातीला तीन-चार सेकंद जास्तीचा वेळ गेला. जाहिरात स्कीप करताना व्हिडीओ काढण्यात आला', असे स्पष्टीकरण माणिकराव कोकाटे यांनी दिले होते.

कृषीमंत्री कोकाटे यांच्या स्पष्टीकरणानंतर शरद पवार गटाचे नेते जितेंद्र आव्हाड यांनी कृषीमंत्र्यांचे आणखी काही व्हिडीओ एक्स या सोशल मीडियावर शेअर केले आहेत. माणिकराव कोकाटे हे विधिमंडळात ऑनलाईन जुगार, रमी खेळत असल्याचा दावा जितेंद्र आव्हाड यांनी केला आहे. आव्हाड यांनी माणिकराव कोकाटेंवर सडकून टीका केली आहे.

'एका बाजूला विधिमंडळाचे काम सुरु आहे. प्रश्न-उत्तरांचा तास सुरु आहे, दुसऱ्या बाजूला कृषीमंत्री माणिकराव कोकाटे हे जंगली रमी खेळत आहेत. त्यांचा व्हिडीओ समोर आल्यानंतर मी जंगली रमी खेळत नव्हतो, जाहिरात बघत होतो, असे कोकाटे यांनी सांगितले होते. पण आता मी दोन नवे व्हिडीओ देतोय. हे व्हिडीओ नीट बघा. कुठला पत्ता, कुठे आणि कसा हलवला आहे, हे व्हिडीओमध्ये पाहायला मिळेल. कृषीमंत्री ऑनलाईन जुगाराचे पत्ते त्यांच्या बोटाने सरकावत आहेत. आणखी पुरावे हवे असतील सांगा, पाहिजे तेवढे पुरावे देतो', असे जितेंद्र आव्हाड यांनी म्हटले आहे.