मराठा आंदोलक मनोज जरांगे पाटील यांनी विधानसभा निवडणुकीमध्ये उमेदवार रिंगणात उतरवले आहे. त्यामुळे त्यांनी महायुतीसोबतच महाविकास आघाडीचे देखील टेन्शन वाढवले आहे. जरांगे पाटील यांनी राजकारणात येण्याच्या निर्णयावर ओबीसी नेते लक्ष्मण हाके यांनी जोरदार टीका केली आहे. मनोज जरांगेंनी सलाईन घेऊन थांबावे असा खोचक टोला त्यांनी लगावला. तसंच उमेदवार देणे आपलं काम नाही असं म्हणत त्यांनी मनोज जरांगेंना सल्ला देखील दिला आहे.

'राजकारणात येऊन उमेदवार उभे करणे हे जरांगे पाटलांचे किंवा माझेही काम नाही. त्यामुळे त्यांनी सलाईन घेवून थांबले पाहिजे, असा सल्ला ओबीसी नेते लक्ष्मण हाके यांनी दिला. आज ब्रम्हपुरी येथे विजय वडेट्टीवार यांना शुभेच्छा देण्यासाठी लक्ष्मण हाके आले होते. यावेळी माध्यमांशी संवाद साधताना त्यांनी राज्यातील विविध मुद्द्यांवर चर्चा करत मनोज जरांगे पाटील यांच्यावर निशाणा साधला. 'आपण सामाजिक चळवळ चालवायची, राजकारण आपले काम नाही.', असेही त्यांनी सांगितले.

मराठा आंदोलक मनोज जरांगे पाटील यांनी विधानसभा निवडणुकीमध्ये महायुती आणि महाविकास आघाडीचे टेन्शन चांगलेच वाढवले आहे. मनोज जरांगे पाटील यांनी विधानसभा निवडणुकीच्या रिंगणात उमेदवार उतरवण्याचा निर्धार केला होता. यासाठी अंतरवाली सराटीमध्ये इच्छुकांच्या मुलाखती देखील ते घेत आहेत. मनोज जरांगेंनी मराठवाड्यातल्या बीडमधील १७ उमेदवारांना निवडणुकीच्या रिंगणात उतरवले असून हे सर्व उमेदवार आज आपला उमेदवारी अर्ज दाखल करणार आहेत. बीड मतदारसंघात मनोज जरांगे पाटील यांना मानणारा मोठा वर्ग आहे. याठिकाणी जरांगे पाटील यांनी उमेदवार मैदानात उतरल्यास प्रमुख राजकीय पक्षांच्या उमेदवारासमोर मोठे आव्हान निर्माण होणार आहे.