काँग्रेसचे नेते बाळासाहेब थोरात यांची कन्या जयश्री थोरात यांच्याबाबत भाजपचे नेते वसंत देशमुख यांनी वादग्रस्त वक्तव्य केले. धांदरफळ येथे झालेल्या सभेमध्ये त्यांनी जयश्री थोरातांबाबत खालच्या पातळीवर टीका केली. त्यांच्या या वक्तव्यानंतर अहमदनगरमधील राजकीय वातावरण चांगलेच तापले आहे. काँग्रेस कार्यकर्ते आक्रमक झाले असून आंदोलन करत आहेत. वसंत देशमुखांच्या या वक्तव्यावर जयश्री थोरात यांनी साम टीव्हीला पहिली प्रतिक्रिया दिली. त्यांनी वसंत देशमुख यांच्या या वक्तव्याचा निषेध केला आहे.

जयश्री थोरात यांनी सांगितले की, 'ते काय बोलतात. काहीच भान न ठेवता त्यांनी अतिशय खालची पातळी गाठत माझ्या मातृत्वावर सुद्धा प्रश्न उपस्थित केले. त्यांचे विचार आणि त्या सभेचे वातावरण कसे असू शकते हे यावरून दिसते. हे अतिशय निंदनीय आणि कोणालाही न शोभणारे तिथे झाले आहे. मी हारणार नाही, मी थांबणार नाही. माझ्यावर कितीही टीका झाली असली तरी सुद्धा मला माहिती आहे मी कशी आहे. माझा सर्व परिवार कसा आहे हे मला माहिती आहे. जर मी थांबले ना तर पुढच्या माझ्या लहान बहिणींना कुठे थांबावे लागले तर असे विचार माझ्या मनात येतात. मी माझे पूर्ण प्रयत्न करेल आणि लढेल. या राजकारणाची पातळी कुठेही खाली घसरून मी देणार नाही.'

दरम्यान, जयश्री थोरात यांनी या वादग्रस्त वक्तव्यानंतर संगमनेर पोलिस ठाण्याबाहेर ठिय्या आंदोलन सुरू केले होते. पोलिस अधीक्षकांनी जयश्री थोरात यांना आश्वासन दिल्यानंतर त्यांनी आंदोलन मागे घेतले. आम्ही आरोपींना तत्काळ अटक करणार असे आश्वासन पोलिस अधीक्षकांनी दिले. त्यांनी सांगितले की, 'मला आश्वासन नकोय कारवाई पाहिजे. गुन्हेगारांना तात्काळ अटक करून कारवाई करा. मग आम्हाला जवाब द्या. २४ तासांत आरोपींना अटक झाली नाही तर पुन्हा पोलीस ठाण्यावर मोर्चा काढू. आमच्या स्वाभिमानाला ठेच पोहचविण्याचे काम सुजय विखे यांनी केलं.'