• उपमुख्यमंत्री एकनाथ शिंदेंच्या हेलिकॉप्टरमध्ये तांत्रिक बिघाड

• एकनाथ शिंदे यांच्या हेलिकॉप्टरमध्ये टेकऑफपूर्वी तांत्रिक बिघाड

• एकनाथ शिंदे गुजरात दौऱ्यावर आहेत

• वडनगरहून अहमदाबादला रस्ते मार्गाने रवाना

गिरीष कांबळे, मुंबई

राज्याचे उपमुख्यमंत्री एकनाथ शिंदे यांच्या हेलिकॉप्टरमध्ये तांत्रिक बिघाड झाल्याची बातमी समोर आली आहे. एकनाथ शिंदे सध्या गुजरात दौऱ्यावर आहेत. गुजरात दौऱ्यावर ते हेलिकॉप्टरने जाणार होते. पण टेकऑफ घेण्यापूर्वीच हेलिकॉप्टरमध्ये तांत्रिक बिघाड असल्याचे पायलटच्या लक्षात आले. त्यामुळे एकनाथ शिंदे रस्ते मार्गाने अहमदाबादकडे रवाना झाले. वडनगर येथे एकनाथ शिंदेंनी हेलिपॅडवर ४५ मिनिटं हेलिकॉप्टरची वाट पाहिली. शेवटी ते रस्ते मार्गाने वडनगरवरून अहमदाबादकडे रवाना झाले. गुजरात दौऱ्यावरून ते परत येताना चार्टर्ड विमानाने येणार असल्याची माहिती समोर आली आहे.

उपमुख्यमंत्री एकनाथ शिंदे आज गुजरात दौऱ्यावर आहेत. बुधवारी रात्रीच ते मुंबईवरून गुजरातकडे रवाना झाले. आज वडनगर येथून ते हेलिकॉप्टरने अहमदाबादला जाणार होते. पण हेलिकॉप्टरमध्ये तांत्रिक बिघाड झाल्यामुळे ते वडनगरवरून कारने अहमदाबादला रवाना झाले. अहमदाबाद येथे पंतप्रधान नरेंद्र मोदी यांच्या वाढदिवसानिमित्त विविध कार्यक्रमाचे आयोजन करण्यात आले आहे. या कार्यक्रमाला एकनाथ शिंदे उपस्थित राहणार आहेत. केंद्रीय गृहमंत्री अमित शहा हे देखील या कार्यक्रमांमध्ये सहभागी होणार आहेत.

अहमदाबाद येथील दौरा संपल्यानंतर एकनाथ शिंदे हे चार्टर्ड विमानाने मुंबईकडे येणार आहेत. ते याठिकाणावरून थेट सातारा येथील दरे गावात जाणार असल्याची माहिती सुत्रांनी दिली आहे. दरम्यान, एकनाथ शिंदे आणि अमित शाह यांच्यातील जवळीक वाढत चालली आहे. ते पंतप्रधानांच्या वाढदिवसाच्या कार्यक्रमात देखील अमित शाह यांच्यासोबत सहभागी होणार आहेत. अमित शहा मुंबई दौऱ्यावर असताना एकनाथ शिंदे त्यांच्यासोबतच होते. गेल्या काही दिवसांपासून अशी चर्चा सुरू आहे की, मुख्यमंत्री देवेंद्र फडणवीस हे केंद्रात जाणार आहेत. तर एकनाथ शिंदे हे राज्यातच राहणार आहेत. पण नंतर फडणवीसांनीच मी राज्यात राहणार असल्याचे स्पष्टपणे सांगितले होते.