• नंदुरबारमध्ये मोठी राजकीय घडामोड

• नवापूरमध्ये काँग्रेसचे नेते आकाश गावित यांचा भाजपमध्ये प्रवेश

• आकाश गावित यांनी शेकडो कार्यकर्त्यांसह हाती घेतला भाजपचा झेंडा

• शिरीष नाईक यांच्या निकटवर्तीयाचा भाजपमध्ये प्रवेश

सागर निकवाडे, नंदुरबार

भाजपकडून जोरदार ऑपरेशन लोटस सुरू आहे. भाजप महाविकास आघाडीतील घटक पक्षांना एकापाठोपाठ एक धक्के देत आहे. भाजपने आता काँग्रेसला मोठा धक्का दिला. नंदुरबारच्या नवापूरमध्ये भाजपने मोठी खेळी करत काँग्रेस आमदार शिरीष नाईक यांच्या निकटवर्तीयाला फोडले. काँग्रेसचे स्थानिक नेते आकाश गावित यांनी भाजपमध्ये पक्षप्रवेश केला. यावेळी त्यांच्यासोबत अनेक सहकाऱ्यांनी भाजपचे कमळ हाती घेतलं. यामुळे राजकीय वर्तुळात खळबल उडाली.

नंदुरबार जिल्ह्यातील नवापूर विधानसभा मतदारसंघात काँग्रेस पक्षाला मोठा राजकीय धक्का बसला. काँग्रेसचे आमदार शिरीष नाईक यांचे निकटवर्ती मानले जाणारे आकाश गावित यांनी आपल्या असंख्य कार्यकर्त्यांसह भारतीय जनता पार्टीत अधिकृत प्रवेश केला. ​भाजपचे आमदार राजेश पाडवी यांच्या प्रमुख उपस्थितीत हा पक्षप्रवेश सोहळा पार पडला. या घडामोडीमुळे नवापूरच्या राजकीय वर्तुळात जोरदार चर्चा सुरू झाली.

माजी खासदार कै. माणिकराव गावित यांचे नातू आणि नवापूर विधानसभेचे काँग्रेसचे आमदार शिरीष नाईक यांच्यासाठी हा मोठा धक्का मानला जात आहे. त्यांचे निकटवर्तीय आकाश गावित यांनी शेकडो कार्यकर्त्यांसह भाजपमध्ये प्रवेश केला. या पक्षप्रवेश सोहल्याला जिल्हाध्यक्ष निलेश माळी यांनी देखील उपस्थिती लावली. या पक्षप्रवेशामुळे नंदुरबारमध्ये भाजपची ताकद वाढली. आगामी स्थानिक राजकीय समीकरणांवर याचा नेमका काय परिणाम होणार याकडे संपूर्ण जिल्ह्याचे लक्ष लागले आहे.