चिपळूणमध्ये भारतीय जनता पक्षाला मोठा धक्का बसला असून हा धक्का दिलाय मित्रपक्ष असलेल्या शिवसेनेने. चिपळूणमधील भाजपच्या बड्या नेत्याने पक्षाची साथ सोडत शिंदे गट शिवसेनेत प्रवेश केलाय. चिपळून पालिकेच्या निवडणुकीत पक्षविरोधी कारवाया केल्याप्रकरणी भाजपने चार पदाधिकाऱ्यांवर हकालपट्टीची कारवाई केली होती. यात माजी नगराध्यक्षा सुरेखा खेराडेंसह भाजपचे माजी जिल्हा उपाध्यक्ष परिमल भोसले यांचा समावेश होता.

आता परिमल भोसले यांनी भाजपला जोरदार धक्का देत थेट शिंदेंच्या शिवसेनेत प्रवेश केला आहे. चिपळूण शहरातील राधाताई लाड सभागृहात कुडाळ-मालवण विधानसभा मतदारसंघाचे आमदार निलेश राणे यांच्या उपस्थितीत भोसले यांनी प्रवेश केला. परिमल भोसले यांच्यासह असंख्य कार्यकर्त्यांनीही भाजपमध्ये प्रवेश केला आहे. यामुळे राजकीय वर्तुळात खळबळ उडाली आहे. या पक्ष प्रवेशामुळे शिवसेनेची ताकद वाढली आहे.

चिपळूण शहराच्या पहिल्या नगराध्यक्ष म्हणून सुरेखा खेराडे यांनी (२०१७) काम केलं होतं. परिमल भोसले यांना भाजपकडून स्वीकृत सदस्य म्हणून पालिकेत काम करण्याची संधी मिळाली होती. परिमल भोसले यांच्या या पक्ष प्रवेशामुळे चिपळूणमधील राजकीय वर्तुळ ढवळून निघाले आहे. आगामी काळात शिवसेनेची ताकद लक्षणीय वाढण्याचे संकेत मिळत आहेत.

चिपळूण पालिकेची दोन महिन्यापूर्वी निवडणूक झाली होती. त्यावेळी परिमल भोसले यांनी पक्षाचा आदेश धुडकावून अपक्ष निवडणूक लढवली होती. त्यामुळे त्यांच्यासह सुधीर पानकर, सुरेखा खेराडे आणि श्रीराम शिंदे यांचे पक्षाने निलंबन केले होतं. पक्षाच्या विरोधात काम केल्यामुळे त्यांची हाकालपट्टी करण्यात आली होती. ही कारवाई प्रदेशाध्यक्ष रवींद्र चव्हाण यांच्या मार्फत झाली होती.

हकालपट्टी कारवाई परिमल भोसले यांनी भाजपवर टीका केली होती. दरम्यान पालिकेच्या निवडणूकीत मला उमेदवारी देण्यात आली नाही, तेव्हा मी पक्षाच्या सदस्यत्वाचा आणि सर्व पदांचा राजीनामा दिला होता. यामुळे पक्षातून निलंबित करण्याचा प्रश्न येत नसल्याचं म्हटलं होतं.