मोठी बातमी! महाराष्ट्रातील खासदार अडकले इराण-इस्रायल युद्धात, दुबईतून आली महत्त्वाची अपडेट

अक्षय शिंदे पाटील, जालना प्रतिनिधी

Kalyan Kale Dubai : इराण, अमेरिका आणि इस्रायल यांच्यातील वाढत्या तणावामुळे आखाती देशांतील विमान सेवा विस्कळीत झाली आहे. याचा फटका अनेक भारतीयांना बसला आहे. दुबईत फिराण्यासाठी, कामानिमित्त गेलेल अनेकजण तिथेच अडकलेले आहेत. त्यामध्ये जालन्यातील काँग्रेस खासदार डॉ. कल्याण काळे यांचा समावेश आहे. कल्याण काळे यांच्यासह जालन्यातील ८ नागरिकही दुबईत युद्धजन्य परिस्थितीमुळे अडकले आहेत.

मिळालेल्या माहितीनुसार, काँग्रेस खासदार डॉ. कल्याण काळे हे २७ फेब्रुवारी रोजी कुटुंबीयांसह खासगी सहलीसाठी दुबईला गेले होते. पण अचानक इस्त्राइल आणि इराण यांच्यातील युद्धाचा भडका उडाला. या आखाती देशांतील युद्धजन्य परिस्थितीमुळे अनेक आंतरराष्ट्रीय विमान उड्डाणे रद्द करण्यात आली आहेत. त्याचाच फटका कल्याण काळे यांना बसला आहे. युद्धाच्या परिस्थितीमुळे ते दुबईत अडकले आहेत. आता ठरलेल्या वेळी त्यांना भारतात परत येणं शक्य होणार नाही.

खासदार काळे यांच्या सुरक्षेबाबत जालन्यातील काँग्रेस कार्यकर्त्यांमध्ये चिंतेचे वातावरण होते. पण ते सुरक्षित असल्याची माहिती मिळाली आहे. कल्याण काळे यांचे बंधू भाऊसाहेब काळे यांनी प्रसारमाध्यमांशी संवाद साधून महत्त्वाची माहिती दिली. ते म्हणाले की, खासदार डॉ. कल्याण काळे आणि त्यांचे कुटुंबीय दुबईत पूर्णपणे सुरक्षित आहेत. विमान सेवा बंद असल्याने त्यांना तिथे थांबावे लागले आहे, मात्र काळजी करण्याचे कारण नाही. परिस्थितीत पूर्वरत झाल्यानंतर ते जालन्याला परत येतील.

जिल्हा प्रशासनाकडून मिळालेल्या माहितीनुसार, खासदार कल्याण काळे यांच्याशिवाय जालना जिल्ह्यातील इतर ८ नागरिकही दुबईत अडकले आहेत. युद्धामुळे विमानतळांवरील निर्बंध आणि विमान सेवा स्थगित झाल्याने हे सर्वजण तिथे अडकून पडले आहेत. प्रशासनाकडून या नागरिकांच्या परतीसाठी आणि त्यांच्या संपर्कात राहण्यासाठी हालचाली सुरू आहेत. परिस्थिती पूर्वपदावर येताच त्यांना मायदेशी आणले जाईल अशी शक्यता आहे.